MOABOT sa 21 ka mga ordinansa ang giaprobahan sa Cebu Provincial Board sa miaging tuig, mas daghan kon itandi sa 13 sa 2017.
Si Provincial Board Member Celestino Martinez III, ex officio ug presidente sa Federation of the Association of Barangay Councils (FABC) sa lalawigan sa Sugbo, ang dunay lima ka mga ordinansa nga napalabang sa Sangguniang Panlalawigan. Upat niini pulos mga supplemental budget ug usa ang annual budget sa lalawigan nga mokabat og P4.69 bilyones alang sa 2019.
Si Bise Gobernador Agnes Magpale, presiding officer sa Sangguniang Panlalawigan, ang nagsunod nga may tulo ka ordinansa nga gipanday.
Samtang dunay tag duha ka mga ordinansa sila si PB Members Edsel Galeos, Thadeo Jovito Ouano, Miguel Antonio Magpale ug Jose Mari Salvador.
Sila si PB Members Christopher Baricuatro, Sun Shimura, Raul Bacaltos, Earl Tidy Oyas, Victoria Corominas-Toribio ug Horacio Franco ang may tagsa ka ordinansa nga gipanday nga napalabang usab sa PB.
Sumala sa bise gobernador siya nalipay nga mas productive ang provincial board ug nakahimo sila og dugang mga departamento.
“Hinuon, Cebu is fast growing and the Cebuanos’ needs similarly increasing. We are proud to announce natuman ang among mga saad sa tinuoray lang,” matod ni Vce Governor Magpale.
Sa record sa Office of the Secretary sa PB, Atty. Pulchra Marie Acevedo, nasayran nga gikan sa Enero hangtod sa Hunyo sa 2018, pito ka mga ordinansa ang giaprobahan sa PB samtang 14 gikan sa Hulyo hangtod sa Disyembre.
Sa 21 ka mga ordinansa, 13 niini mga orihinal, pito ang amedments ug usa ang revision.
Sa mga ordinansa nga naaprobahan, dunay naghatag og pagtagad sa panginahanglanon sa mga senior citizen, mga tinun-an, kababayen-an, kabataan, kabos ug turismo.
Kini naglakip sa pag-amendar sa Tourism Code of the Province of Cebu, Women Development Code of Cebu Province ug Children’s Code of Cebu Province nga giduso sa bise gobernador; ang pag-revised sa Cebu Tertiary Education Assitance Program (CTEAP) ngadto sa angayan nga mga tinun-an sa kolehiyo sa kalungsuran ug mga dakbayan sa lalawigan ni Baricuatro ug libreng mga serbisyo sa mga tambalanan sa lalawigan ngadto sa kabos ug mga indigent nga pasyente nila ni Franco ug Salvador.
Apil usab ang ordinansa gipanday ni Salvador nga naghatag og P2,000 nga binuwan nga transportation allowance ngadto sa mga opisyal ug mga miyembro sa board of trustees ug tag P2,000 nga quarterly allowance sa mga presidente sa Cebu Provincial Federation of Cities and Municipalities Senior Citizens Association of the Phils. Inc.
Lakip sa naaprobahan ang kabahin sa pagpanalipod sa kinaiyahan, seguridad ug paghatag og pagtagad sa problema sa gidili nga drugas sama sa paghimo og comprehensive closed-circuit television (CCTV) system sa lalawigan ug katukoran sa Cebu Provincial Inter-Agency Council for Traffic Operations and Management nga gipangamahan ni Galeos, ang Province of Cebu Low Carbon Development ni Ouano, ug katukoran sa Cebu Province Community-Based Treatment Program ni Oyas. (SCG)