Nalzaro: Kapalpakan sa mga district hospitals

KON wala pa ma-upload sa social media, wala kitay kasayuran kon unsay nahitabo aning usa ka biktima sa pagpamusil didto sa emergency room sa Tuburan District Hospital niadtong Pebrero 8. Usa ka Jimby Casas, gidala sa maong tambalanan human mapusili atol sa usa ka drug bust sa kapulisan. Nakita sa video nga nakuha ug gi-upload sa usa ka nurse on duty, ang naglimbag-limbag ug nagtinga nga Casas diin nangayo og tabang sa mga medical personnel. Apan way nagpakabana nga mitabang kaniya hangtod nga kini namatay.

Apan matod pa ni Dr. Rene Catan, chief of Integrated Provincial Health Office (IPHO), nga dili kompleto ang maong video nga nakuha sa usa sa mga nurse on duty ug gipasa sa lain nurse nga maoy mi-upload niini sa social media nga nahimong viral. Ang nakita lang mao ang pagpangayo og tabang sa biktima apan ang unang eksina nga gitabang siya sa mga hospital personnel wala maapil. Matod pa ni Catan nga aduna gyoy mga hospital personnel nga mihatag og first aid sa biktima apan mi-atras ang mga staff gumikan kay gipanglud-an ug gipangpatiran kini sa biktima.

Busa ila na lang unang gipasagdan nga maoy nakita sa video. Pero ila gyud kining gitabangan. Pangutana? Kon gitabang pa, nganong wala may nakitang dextrose o bisan unsang ekipos sama sa oxygen ang gitaud sa biktima? Naglisud na god intawon to og ginhawa busa ang unang himoon sa mga attending medical staff mao ang pagbutang og oxygen aron ma-abagan ang pagginhawa.

Gi-imbestigahan kuno ni Catan ang hitabo ug iya nang gimanduan ang district hospital chief nga gipa-ubos sa suspension ang mga nurses. Mi-imbestigar na usab ang Commission on Human Rights (CHR 7) sa posibleng kalapasan nga nahimo sa mga attending personnel ngadto kang Casas.

Sayop ang unang lakang ni Catan. Mas una pa man niyang gipa-imbestigahan ang mga personnel nga nagkuha ug nag-upload sa video inay nga unang imbestigahan ug silutan ang mga nagpabaya o wala magpakabana nga mga personnel. Asa may sesryoso nga kaso, ang wala pag-atiman sa emergency nga pasyente o ang pagkuha og pag-upload sa maong video? (bobbygnalzaro@gmail.com)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph