STO. TOMAS, Davao del Norte -- Dead on the spot ang usa ka negusyante kinsa gipusil-patay sa wa pa mailhing mamumuno.
Ang insidente natigayon alas 12 Sabado sa udto, Pebrero 16, sa Purok 2, Feeder Road 1, Barangay Tibal-og.
Si Senior Superintendent Ferlu Silvio, Davao del Norte Provincial Police Office (DNPPO) director, nag-ila sa biktima nga si Rolando Villaruz Esmaya, hamtong ang pangedaron.
Sumala ni Senior Superintendent Ferlu nga usa ka makuting imbestigasyon ang ilang gihimo karon, aron matumbok ang motibo sa pagpatay ug masikop ang mga responsable.
Dugang sa opisyal nga momugna sila og Special Investigation team nga motutok sa maong kaso alang sa hinanaling kasulbaran sa krimen.
Nasayran nga ang biktima sakay sa iyang sakyanan dihang gitaparan sa riding-in-tandem dayon gipusil sa makadaghang higayon.
Ang Scene of the Crime Operatives sa DNPPO nakarekober og mga basiyo sa bala sa M16 sa nahitaboan nga maoy gigamit sa pagpamanhig.
Wala giwala sa imbestigasyon sa kapulisan sa Sto. Tomas Municipal Police Station ang posibleng personal nga bangi nga miresulta sa kremin.
Hinuon, walay rekord ang biktima sa kapulisan samtang ang operatiba sa Sto. Tomas MPS padayong mihimo og makuting imbestigasyon sa kaso.