Editoryal: Maoy salawayon

NASUSPENSO ang tulo ka mga nurse sa Tuburan District Hospital tungod sa nag viral nga video sa himatyon nga pasyente nga ingon sa wa dayon tabanga.

Nasuspenso sila tungod sa pagkuhag video sa pasyente, di tungod sa pagtuo sa publiko nga wa tabangi ang pasyente sud sa emergency room. Matod ni Dr. Rene Catan nga gitabang sa mga nurse ang pasyente nga usa ka gidudahang drug pusher. Wa lang kuno makita sa video.

Apan ang nasuk-an sa publiko di tungod kay gikuhaan og video samtang naglisod sa pagginhawa ang pasyente. Ang gisaway mao ang ilang kakuwang sa urgency kun kadinalian sa sitwasyon kay kinabuhi ang nakataya niadtong higayuna.

Dunay pipila ka mga netizen nga okay ra nila nga napusilan, apan ang gikasuk-an sa kadaghanan mao ang ingon sa kakuwang sa hingtungdang mga medical personnel og pakabana sa pagluwas sa kinabuhi sa gikatahapang drug pusher.

Bisan tan-awon pa kini, nilanat pa tingalig pipila ka mga minuto una pa nadapatan sa pasiunang medical procedures ang mao nga lalake. Pun-an pa sa di maayong mga pulong nga madungog sa video footage.

Di ba dapat nga sa ingon niadto nga sitwasyon, gikinahanglan ang dinalian nga pagtabang? Matag segundo dako na kaayo og epekto sa kinabuhi sa usa ka tawo nga naglisod. Bisan tingali nga klaro na siyang himatyon o mamatay, gidali unta ang pagtabang sa pasyente. Apan sa video, ingon sa wa gyud sila magdali.

Nakakita na ba kaha si Gobernador Hilario Davide III sa video? Kay kon nakakita siya, posible kaayong di siya makauyon ug sama sa kinabag-an sa netizens, makakita sa kakuwang sa dinaliang pagtabang unta sa mga nars sa mao nga pasyente.

Kay gawas nga kalapasan sa mga lagdang medikal ang ilang gibuhat, ang perception nga namugna sa video ngadto sa publiko di maayo. Ingon sa wa silay interest sa pagluwas sa kinabuhi sa himatyong pasyente.