MOABOT ngadto sa P13.6 million nga balor sa illegal nga drugas ang nasakmit sa mga sakop sa Pardo Police Station gikan sa tulo ka gikatahapang drug pushers atol sa buy bust operation sa sitio Cogon, Barangay Pardo sa Sabado sa gabii, Pebrero 16.
Ang tulo ka mga suspek giila sa kapulisan nga sila si Danilo Dela Cerna, 22, ug Giovanni Canesare, 22, pulos taga sitio Manol, Barangay Tisa, siyudad sa Sugbo.
Nakuha gikan kanila ang dakong putos sa gituohang shabu nga motimbang og duha ka mga kilo.
Gibana-banang duna kini Dangerous Drugs Board (DDB) value nga P13.6 milyunes.
Matod ni Chief Insp. Regino Maramag, hepe sa Pardo police station nga mao usay nangulo sa buy bust operation nga moabot og tulo ka buwan nila nga gipanid-an ang duha.
Human makompirmar nga adunay daghang supply sa drugas nga naabot kanila ni ni Dela Cerna ug Canesare, ni-transact dayon silag 25 grams nga mobalor og P170,000.
DULJO CONNECTION
Sa imbestigasyon kanila, giingong gikan kang Ogie Rojas, taga Duljo Fatima, ang drugas.
Matod sa duha igo lang sila gipabaligya.
Si Rojas nalakip sa High Value Target (HVT) sa kapulisan sa syudad sa Sugbo ug taodtaod na nilang gipanid-an.
Sakop sila sa usa ka Berto Randy drug group nga naglihok sa syudad sa Sugbo.
“Kung titingnan mo ang packaging. may kulay blue. Parang galing Metro Manila kasi may semblance sa mga nakuha doon sa Luzon. Titingnan pa natin kung may connection ito doon,” matod ni Maramag.
Nigawas ang ngalan nilang Dela Cerna ug Canesare sa mga nangadakpan sa Pardo police station. Duna pay mga ngalan nga gipang tug-an si Dela Cerna apan ila pang susihon.
DRUG DEN
Drug den nga gipadagan sa usa ka ex convict sa kasong highway robbery ug murder gironda sa Waterfront police station.
Siyam ka mga manuyopay ang nadakpan.
Ang target sa buy bust operation mao si Alejandro Gallado, alyas Aly,64, taga sitio Villagonzalo Dos, Brgy. Tejero, sa syudad sa Sugbo.
Matod ni Sr. Insp. Joemat Pomarejos, hepe sa Waterfront police station, nga sa dihang napalitan sa iyang sakop si Gallado, naabtan pa sa sulod ang 9 nga nanuyop.
Ang siyam giilang silang Reymar Cruda,20, truck boy, taga Brgy Cogon,Compostela Cebu; Chino Tambog,19, taga Brgy Pahak,Lapu-lapu City; Joseph Saquin, 28, taga Brgy Pahak,Lapu-lapu City; Dexter Tumulak, 25, taga Brgy Pahak,Lapu-lapu City; Juril Durog,24, taga Brgy Labogon,Mandaue City; Nebalyn Caballero,30, taga Brgy. Lorega,Cebu City,;Jenny Catalan,21, taga Brgy Tejero, Cebu City; Ricardo Colegado,38, truck driver, taga Poblacion, Brgy 3 Tuburan Cebu; ug Charlie Erato,20, truck boy, taga Brgy Cogon,Compostela Cebu.
Pulos sila nakuhaan og drugas nga motimbang ang tanan sa 1.5 grams nga mobalor og P10,200.
Wa malakip sa listahan sa mga nalambigit sa ilegal nga drugas si Gallado apan naka monitor na sila sa illegal nga negosyo niini .
LAING 2 NADAKPAN
Giingong HVT ug iyang kauban nasikop sa buy bust operation sa mga sakop sa Station 10 sa Cebu City Police Office nga gipangulohan ni Police Chief Insp. Keith Allen Andaya pasado alas 9 sa buntag sa Sabado, Pebrero 16, sa A. Lopez street, Barangay Labangon, ning siyudad.
Ang mga dinakpan mao silang Jonel Engreso, 19, target za buy bust operation, taga Arellano street ug Janjan Malabay Dela Torre, 33, taga R. Palma street barangay San Roque, siyudad sa Sugbo.
Nakuha gikan kang Engreso ang tulo ka gagmay ug duha ka dagko nga pakete sa gituohang shabu samtang kang Dela Torre usa ka medium size nga motimbang ang tanan og 55 gramos nga mobalor ang tanan og P374,000. (Dugang taho ni Angelo H. Siesmundo, USJ-R Intern)