DILI na trese (13) ka kandidato ang team sa Hugpong Nang Pagbabago (HNP) human gihulog ni Presidente Rodrigo Duterte ang tulo, sila si Ramon “Bong” Revilla Jr. ug si Jinggoy Estrada, ingon man ang kanhi TV newscaster Jiggy Manicad.
Kung unsay mga hinungdan, presidente lang ang nasayud, pero ang pagduda sa tanan mao ang kasong plunder nga giatubang sa duha, ug labot kang Manicad, ang presidente ra ang nahibalo sa tanan.
Sa HNP, upat ra nga taga Mindanao ang anaa sa partido, sila si Christopher “Bong” Go, Ronald “Bato” dela Rosa, nagpasubli nga Senador Aquilino “Koko” Pimentel III ug Dong Mangudadatu.
Unta dili kini kalimtan sa mga botante dinhi sa Mindanao tungod kay taga Mindanao ang atong presidente, kinahanglan adunay ubay-ubay nga magbabalaod nga taga dinhi nga modaug aron maoy mosuporta sa iyang administrasyon.
Despirado na ang mga kandidato sa oposisyon sa Davao del Sur, dili palang dugay nakadawat og pasidungog ang City Government of Digos sa “Seal of Local Governance”, dili ka basta basta modaug niini kung dili nimo makuha ang mga rekesitos nga maoy basihan nga modawat og pasidungog ang siyudad.
Ang problema sa Digos City ubos sa pamunoan ni Mayor Joseph Peñas, daghan og kakulangan, usa na niini ang sanitary landfill, traffic signalization nga kwalipikado na unta ang siyudad sa Digos ug sa daghan pang uban.
Karong bag-o, nadiskubrihan nganong nakuha kini sa Digos City ang maong pasidungog? Tungod kay ang mga papeles sa lungsod sa Sulop mao ang alegasyong gigamit sa admistrasyon ni Mayor Peñas, aron lang makuha ang maong pasidungog.
Sa Davao del Norte, labaw pa nga daw desperado ang kampo ni Congressman Pantaleon Alvarez, gumikan kay ang mga tarpaulin ni governor Anthony del Rosario(AGR) ilang gisulatan og “Iboto ninyo ang tarong nga congressman sa unang distrito, DILI NA AKO”.
Nia pa, nag-drawing drawing sila og hulagway ni Presidente Rodrigo Duterte nga nag-endorso sa ilang team sa PDP Laban sa pagka gobernador ug congressman sa una ug ikaduhang distrito.
Karon, kung gamiton ta ang 'sentido comon' ug dili layaw nga utok, -- kung giindorso pa sila sa atong Presidente sa usa ka rally didto sa Luzon, atoa untang makita sa television. Nakita ba nato? Wala, didto ra gipatik sa ilang senimana nga mantalaan sa Tagum City.
Pabaga nalang gyud ta sa nawong kay despirado naman, unsaon pag endorso sa presidente nga wa mana sila didto sa rally?
Ug nganong i-indorso man kuno sila, nga naa ma’y kandidato si PRRD, gani giisa na ni Mayor Sara ang kamot ni Congressman Tonyboy Floirendo Jr., AGR, RDR Jr?