Editoryal: JS Prom

GIINGONG usa sa mga di malimtan nga kasinatian sa hayskol mao ang Junior & Senior Promenade o JS Prom nga matigayon sa bulan sa mga kasingkasing, Pebrero.

Gumikan kay nakita ngari nga sadya ug mabulukon kung matigayon ang susama niini, duna sa'y lahi nga programa ang Juniors ug mga Seniors nga gitawag nga Senior's Ball o di ka ha Junior's Ball diha sa koliheyo.

Apan ning paglabay sa mga panahon uban sa pagsulod sa moderno nga teknolohiya, hinayhinay na nga nangawala kining maong “social gathering” sa mga estudyante.

Unang isyu nga migula mao ang paghatag og memorandum sa Department of Education (DepEd) nga di na “compulsory” kun di na obligahon ang mga estudyante nga paapilon sa maong kaugdahan.

Nakita sa DepED nga gasto kaayo ang maong programa nga maoy usa sa mga magpabug-at sa badget sa mga ginikanan.

Hinuon, dunay mga tunghaan labi na sa mga private schools nga mopahigayon gayod sila niini, ug gani daghan og reklamo ang pipila ka mga ginikanan tungod “required” kon gikinahanglan gayod nga moapil.

Ang problema mitumaw, dihang giingon sa usa ka ginikanan nga bisan og di moapil ang estudyante, mobayad gihapon kini pag-abot sa ting perma sa clearance.

Kini sagad mahitabo sa mga private schools, hinuon di kabuot ang DepEd niini kay pribado man, apan kung nasabutan man sa mga ginikanan sa private school, nan walay mahimo kung nagustohan ug naaprobahan kini sa kadaghanan.

Kung sa tan-aw nga malipay ang kabataan sa maong programa, nganong di man paapilon, nga kabahin man kini sa paghulma sa ilang pagsalig sa kaugalingon ug sa pagpalambo sa ilang sosyalisasyon.

Apan kung sa tan-aw malisdan sa badget, nan pasabton sab ang mga estudyante sa sitwasyon ug mamahimong andam unta sa tanang butang sa layo pa ang programa aron di maglisod ug di moreklamo.