COTABATO CITY -- Patay ang usa ka negusyante sa pagpamusil alas 9:15 sa buntag niadtong Sabado sa dakbayan sa Cotabato.
Giila ang biktima nga si Aldam Ubpon Modin, 51-anyos, minyo, fish vendor ug molupyo sa Purok Bonsen Mother, Barangay Tamontaka.
Gibutyag ni Cotabato City Police director Senior Superintendent Rolly Octavio nga samtang pagawas ang biktima sa iyang balay ug naglakaw paingon sa terminal sa traysikad kalit lang siyang gisugat sa duha ka wala mailhing tawo ug gipusil gamit ang kalibre .45 nga pistola.
Abtik sab nga miikyas ang mga namusil sakay sa usa ka motorsiklo nga walay plaka paingon sa hilit nga dapit sa dakbayan sa Cotabato.
Patay on the spot ang biktima nga naka-angkon og samad pinusilan sa iyang dughan, likod ug tiyan nga parte sa lawas.
Pulos dunay taptap nga panyo sa ilang nawong ang mga suspetsado hinungdan nga wala sila mamay-ungan sa mga sibilyan nga nakakita sa hitabo.
Apan ang pamilya sa biktima ang dunay pagduda sa mga tawo nga mipatay sa ilang kabanay.
Sa kasamtangan ang kapulisan sa siyudad ang padayon nga nag-imbestiga sa maong krimen. (EEF)