ANG Barangay 76-A, Bucana sa Davao City, padayong nakigkoordinar sa Women and Childrens' Protection Desk (WCPD) sa San Pedro Police Station, gumikan sa mga batan-on nga punay magmugna og kasamok panahon sa kagabhion sa maong barangay.
Kini ang gibutyag sa Davao City Police Office (DCPO) diin mihimo na sila og pagpanubay sa dapit aron malikayan ang kagubot sama sa riot.
Giingon sa DCPO nga ilaha dayon nga rescue-hon ang mga bata nga nalambigit niini nga kasamok.
"Rescue-hon na nato sila, dayon atong iindosar sa QRTCC," ingon ni DCPO Spokesperson Senior Inspector Ma. Theresita Plaza-Gaspan.
Dugang ni Gaspan nga kinahanglan dunay pagpa-implementar sa pagronda sa mga sakop sa barangay tanud sa dis-oras sa kagabhion diha sa dapit.
"Kinahanglan gyod ang mga barangay tanud, kay sila ang naa sa dapit, ug mo-support dayon ta, pinaagi sa pagpabahis-bahis sa atong mga mobile patrol sa maong barangay," ni Gaspan.
Giangkon sa taga barangay nga nalisdan gayod sila bisan paman sa pagpatuman nila sa “curfew on minors” naa gihapo'y mag-riot nga mga batan-on.
Giingon sab sa Barangay 76-A nga mopahigayon sila og pagkig-istorya sa mga ginikanan matag purok gumikan ang mga ginikanan lamang ang makapitol sa ilang mga anak. (JPC)