DIGOS CITY -- Miabot ang kapulisan sa Medical Center of Digos Cooperative (MCDC) diin gisilbi ang orden de aresto batok sa retiradong sakop sa Philippine National Police (PNP) samtang gidapatan og medikasyon, alas 10:25, Sabado.
Nailhan ang suspek nga si Antonio Monteverde, 55-anyos, minyo, nga molupyo sa Nakayama Village, Barangay Sinawilan.
Gibutyag sa Digos City Police Office (DCPO) nga ang akusado nag-atubang og tulo ka ihap sa paglapas sa Republic Act (R.A) 9262 nga nailang Anti-Violence Against Women and their Children (VAWC) Act of 2004.
Ang orden de aresto gipaguwa sa Regional Trial Court (RTC) Branch 18 ug gilagdaan ni Executive Judge Carmelita Sarno-Davin niadtong Hulyo 30, 2018.
Hinuon, aduna'y girekomendang piyansa ang korte nga kantidad P24,000 matag usa ka ihap ug misumada kini sa P96,000.
Wa na hinuon gikabutyag paunsa nga nakomitar sa suspek ang hitabo nga maoy hinungdan nga nakasohan siya og VAWC.
Gibantayan una sa kapulisan ang suspek samtang anaa pa kini sud sa bay tambalanan.