Super Iskolar: Kutsinta Vendor ngadto Educator

TUNGOD sa kapobrehon usahay makaingon nalang ta nga kung molampos sa pagtuon usa kini ka mirakuloso.

Kung lisod kaayo ang kahimtang sa mga ginikanan, lisod kaayo kabtunon ang damgo sa mga anak nga makahuman sa pagtoun.

Dili tiaw nga ang mga inahan magkautang utang makabayad lang sa tuition sa mga anak.

Kini ang paghulagway ni Benjie Liloc, taga lungsod sa Balingoan, Misamis Oriental sa iyang kinabuhi samtang gatungha pa. Wala gikaulaw niini nga gasige siya og pamaligya og puto ug kutsinta tungod sa labihan kalisod samtang nagtoun sa elementary ug highschool.

Gipadako lamang si Benjie sa iyang inahan nga nag-inusara.

“I grew up from a broken family and raised by my mother whose income was only enough for us to eat. Lisod kaayo ang among kinabuhi. Every day was a survival of the fittest.” Matud ni Liloc ug midugang nga miabot pa sa punto nga ipanghatag nalang unta sila tungod sa labihan kalisod.

“It almost reached to the point nga ipanghatag nami sa among inahan but her love for us prevented her from doing so.”

Sa edad nga 13 anyos gasugod na si Benjie sa pagpamaligya ug sa iyang pangidaron nga unta maglaag pa ug mag-enjoy sa kabataan mas naunhan sa responsibilidad sa pamilya.

“At early age I sacrificed my life and my youth days in order to help my mother and survive.” Matud niini ug miingon nga adunay mga panahon nga sa iyang sige pagpamaligya nihit kaayo ang gapamalit ug halos wala siyay halin.

“There was a time, kamulo ko og pamaligya, init kaayo ang panahon. Grabe na nakong tuyok tuyok sa Balingoan pero gamay ra kaayo ang nipalit sa akong baligya. I almost want to cry. I took a sit, breath heavily and told myself. “Benjie, you cannot live your lifetime like this, take a rest but do not stop. Get up and keep moving on.” Matud niini.

Human sa iyang pagradwar sa High School, nakahukom magtungha sa kolehiyo diha sa Misamis Oriental Institute of Science and Technology sa lungsod sa Balingasag, Misamis Oriental.

Kini human gipasaligan og scholarship nga wala na niini ginganlan apan sa iyang kadismaya wala gibayaran iyang tuition fee.

Tungod niini nakaundang og isa ka tuig tungod sa hangyo sa iyang inahan nga dili na niini makaya ang pagpa skwela. Apan wala gihapon nawad-an og paglaom si Benjie.

Sa iyang kaikag nga mogradwar naghangyoay kini sa iyang mga magtutudlo nga makapadayon sa pagtoun.

“I survived my first year in college pleading to my teacher to let me take my exam and making promissory notes but still I keep on searching for scholarship.” Matud ni Benjie ug midugang nga gasige pa siya og pasalig nga mobayad ug niabot sa punto nga gi ultimatuman na siya sa magtutudlo nga kinahanglan na mobayad og tuition.

Gikakurat niya og maayo dihang pagbisita niya sa cashier’s office nakaltasan og P2,500 ang iyang tuition kay diay mipasar siya sa usa sa iyang giaplayan nga scholarship program ni Governor Yevgeny Vincente Emano nga kining gitawag nga Iskolar ko Ni Bambi.

Sa pagligid sa panahon, wala naundang ang iyang scholarship sa IKNB ug tungod sa tabang niini milampos si Benjie sa pagtoun ug migradwar sa kolehiyo.

“I graduated from college. I landed to a noblest job which is teaching, and passed the licensure examination for teachers.” Matud niini ug midugang nga sa pagkakaron nagtudlo siya sa St. Marys Academy of Talisayan.

Atol sa ika 12th General Assembly sa IKNB usa siya sa nahatagan og higayon nga makatestimonya ug hatag inspirasyon atubangan sa 3,000 ka mga batan-on sa Misamis Oriental nga karon kamulo pa og tungha.

Tambag niini sa mga tinun-an nga dili mag-undang, magpadayon kay naay kapaingnan ang tanan.

“There is no shortcut to success. In order to be successful, do not underestimate the power of prayer. Just take a rest, but do not stop. Listen to yourself. Get out of your comfort zone. Plant your seed and have a sweet harvest of tomorrow.” Matud niini.

“Ako diay si Benjie Liloc. A kutsinta-puto vendor and now a licensed professional teacher, believing, Good things come to those who wait but better things come to those who work for it.” Inspirational nga mensahe niini.