NAKABSAN sa kinabuhi ang driver samtang adunay 16 ka mga samaran dihang nagbangga ang usa ka dyip ug van niadtong Biyernes sa gabii sa Diclum, Manolo Fortich, Bukidnon.
SI Police Officer 3 Christian Dale Carlos, traffic investigator sa Manolo Fortich Police Station nibutyag sa SunStar SuperBalita Cagayan de Oro nga ang driver sa HYUNDAI H-100 Van nga mao si Michael Baraucor, maoy naipit ug dead on arrival sa Bukidnon Provincial Hospital Annex sa Manolo Fortich.
Detinado na usab ang driver sa dyip nga nga mao si George Election.
Matud ni PO3 Carlos nga ang dyip padulong Alae niadtong tungora nga adunay sakay nga 9 ka pasahero samtang ang van gikan sa Marantao, Lanao del Sur ug padulong sab sa Valencia City nga dunay 16 ang sakay.
Bersyon sa driver sa dyip nga kalit nawad-an og brake ang iyang gimaneho hinungdan misarasay kini ug mibanga atubangan nga bahin sa van.
Nakumi ang atubangan nga bahin sa van hinungdan sa hinanaling kamatayon sa driver dihang naipit.
Anaa pa sa nagkadaiyang balay tambalanan ang 16 ka mga pasahero sa van diin adunay bata nga talandugon ang kahimtang.
Ang mga pasahero sa dyip samdan sab apan outpatient sa balay tambalanan.
Sa pagkakaron gihulat lang sa imbestigador kung pasakaan ba og kaso ang driver sa dyip o aduna bay mahitabong settlement labina nga gitakdang ibalik sa ilang lugar ang patayng lawas sa driver aron malubong ra kini sa dinalian sama sa ilang tradisyon.