MOKABAT sa 200 ka mga pastor ug bishop ang nagkatigom ug nagpadayag sa ilang dakong suporta sa partido sa PaDayon Pilipino ug Centrist Democratic Party (CDP) niadtong Pebrero 15 sa Misamis Oriental Integrated Sports Center (MOISC) sa dakbayan sa Cagayan de Oro.
Ang grupo nga Society of Active Leaders for Transformation nagpahigayon og Politicial Forum 2019 diin naghatag og panalangin ngadto sa partido nga ilang gihatagan sa ilang suporta.
Matud ni Reverend Bishop Bong Galapo, presidente sa organisasyon nga tumong niini nga kalihokan mao ang pagdasig sa tanan mga political leaders aron nga magkinabuhi nga nahi-uyon sa kabubut-on sa Ginoo.
“Agi og pagdasig labina sa political leaders nga unsaon pagkinabuhi uyon sa kabubut-on sa Ginoo. Akong nakita ang kinabuhi ni Moises samtang nagapangalagad sa Ginoo,” matud ni Galapo.
Samtang mibutyag usab si Jose Gabriel Pompee La Viña, nagpapili sa pagka Mayor ubos sa maong partido nga aminado kini nga bata pa sa hisgotan ang politika ug nagsugod lang matud kini sa dihang gisuportahan ang pagpapili sa kasamtangang Presidente.
Giingong dako ang pagdayeg usab niini sa kanhi mayor sa siyudad gumikan sa dako nga nakitang gugma matud diha sa katawhan.
“Dili malalis diri sa Cagayan de Oro kung estoryahan ang gugma sa kabus walay kaparehas sa gugma ni Mayor Dongkoy Emano ngadto kanila,” matud ni La Viña.
Ang maong mubo nga kalihokan giingong unang higayon nga gi-organisa sa relihiyosong grupo.