NAPALGANG naglutaw ug wala na’y kinabuhi ang usa ka amahan nga naligo sa suba niadtong nilabay nga adlaw Pebrero 14 sa Barangay Balulang sa dakbayan sa Cagayan de Oro.
Ang biktima naila nga si George Jabonillo, 53, minyo, lumad nga taga Cebu apan kasamtangang ania sa dakbayan sulod sa duha ka mga semana human usab nagtrabaho diha sa may quarry.
Sa nahipos nga impormasiyon gikabutyag nga napalgan sa namingwit ang patay nga lawas nga na-anod diha sa Cagayan de Oro river duol sa tulay nga nagkonektar sa Tibasak, Macasandig ug sa Balulang.
Kahinumduman nga naligo ang biktima apan kalit kining nalumos ug gani nakapangayo pa kini og tabang ug gisulayan sa mga kauban sa pagluwas apan wala na kini maapsi.
Giingong kanunay na kini nga maligo sa suba apan kini ang unang higayon sa pagligo sa maong dapit diin medyo lalom ug sulog ang tubig.
Samtang matud sa pag-umangkon sa biktima nga duna kini sila’y kalagot ug pagmahay human nga medyo nalangan ug wala dayon nilihok ang mga rescuer gumikan kay ngitngit ang maong dapit ug maglisod sila sa pagpangita sa biktima.
Sa pagsulat niini nga balita ang maong patay nga lawas ang anaa na sa punerarya sa St. Peter ug gitakdang dalhon pagbalik sa Cebu.