DEPENSA lang ang gihimo sa usa ka lalaki pagpusil sa panday niadtong Pebrero 15 sa Upper Puerto sa dakbayan sa Cagayan de Oro.
Kini ang gibutyag ni Devie Moralde, 41, usa ka sekyu ug giingong membro sa Moro National Liberation Front (MNLF) human mitahan sa iyang kaugalingon ngadto sa kapolisan human nisibat ug nidangop sa tsirman sa Moro National Liberation Front (MNLF)-Bukidnon sa Maramag nga si Datu Didilusan Arroyo.
Si Moralde ang gitumbok nga mipusil patay kang Ruben Bacalso, residente sa Alae, Manolo Fortich, Bukidnon kinsa igo lamang nibisita sa maong dapit diin nahitabo ang insidente.
Gibutyag ni Moralde nga nakadawat na siya og bahad gikan kang Bacalso hinungdan nga naniguro kini ug gidepensahan ang kaugalingon.
“Wala man gyud ko’y intensiyon kay pamilyado biya ko, paniguro nakog ilog kay duha man ang nag-atake nako,” matud ni Moralde.
Giingong duha ang nagtabang kaniya diin usa niini ang nagdala og kalibre .38 nga armas samtang si Bacalso nagdala og botelya apan iya kining na-ilog ug napusilan si Bacalso.
Samtang gibutyag usab sa kapulisan sa Police Station 6 (PS6) sa Puerto ubos kang Police Chief Inspector Abdul Alim Sumandar nga padayon pa ang ilang imbestigasiyon aron masuta ang tinuod nga nahitabo ilabi na nga managlahing bersiyon ang nadungog niini.
Ang suspetsado ang kasamtangang nagtingkagol karon sa mini-cell sa PS6 human usab niangkon nga iyang napusilan ang biktima.