GUMIKAN sa nagkadaghan nga mga commercial center ug establisemento nga naa sa daplin sa karsada, gihigpitan sa lokal nga kagamhanan sa lungsod sa Consolacion ang gikusgon sa dagan sa mga sakyanan nga moagi sa mga karsada nga ubos sa hurisdiksyon niini.
Sa Ordinance No. 27 kun Speed Limit Ordinance, gimando ang speed limit sa tanang klase mga sakyanan nga molabay sa mga karsada sa lungsod, ug ang pagpahamtang og mga silot alang niadtong makalapas niini.
Niadtong Disyembre 27, 2018, giaprobahan ug gipirmahan ni Consolacion Mayor Teresa Alegado ang ordinansa ug giduso kini ngadto sa Sangguniang Panlalawigan sa Sugbo alang sa pagtugot nga nadawat sa Office of the Provincial Secretary niadtong Enero 31, 2019. Anaa kini karon sa committee on public safety, peace and order nga gipangulohan ni Provincial Board Member Sun Shimura.
Matod ni Alegado, kaniadto ang speed limit gimando alang sa mga sakyanan nga moagi sa mga eskwelahan sa lungsod subay sa Republic Act 4136 kun Land Transportation and Traffic Code.
“Kaniadto schools ra gyud, karon tanan na gyud, end to end, tungod kay ang density sa among katawhan taas na kaayo. Daghan kaayo mga commercial establishment along the road, vulnerable kaayo ang mga pedestrian mabanggaan nila kondili sila mo-observe sa speed limit,” pasabot sa mayor.
Ubos sa Section 35 sa RA 4136, ang mga pasaheroang sakyanan, motorsiklo, trak ug mga bus gitugotan hangtod sa 20 kilometros matag oras nga gikusgon kon magdagan sa kadalanan nga daghan og mga tawo, nagpaingon sa mga intersection sa “blind corners,” moagi sa mga school zones o molabay sa ubang mga sakyanan nga naka-stationery.
Sumala sa mayor karon nga nasinati na ang kahuot sa dagan sa trapiko sa ilang lungsod dili na maobserbahan ang speed limit kay mag-aginod ang pag-irog sa mga sakyanan.
Ubos sa Ordinance No. 27, kinahanglan di molapas sa 30 kilometros matag oras ang gikusgon sa dagan sa mga bus ug motor trucks nga moagi sa provincial ug municipal roads.
Kon pasaheroan o pribadong mga sakyanan, mga motorsiklo ug susamang mga sakyanan ang moagi sa provincial roads, 40 kilometros matag oras ang gitugot, samtang 30 kilometros matag oras kon sa municipal road kini moagi.
Kon kini nga mga sakyanana anha moagi sa mga barangay roads o sa kadalanan nga daghan ang mga tawo, hangtod sa 20 kilometros matag oras lang ang maximum allowable speed base sa ordinansa.
Ang makalapas sa ordinansa, pamultahon og P500 ug upat ka oras nga seminar on road safety sa unang paglapas, P1,500 ug upat ka oras nga seminar on road safety sa ikaduhang paglapas ug P2,500 o i-impound ang sakyanan o pagkapriso nga di moubos sa 30 ka adlaw o mag-agad sa desisyon sa korte sa ikatulo ug sa mosunod nga mga paglapas.
Ubos sa Section 8 sa ordinansa, dunay mga sirkumstansya nga gitugot nga dili masunod ang speed limit basta maseguro nga dili kini magbutang sa peligro sa kinabuhi o propiyedad.
Apil niini ang drayber sa sakyanan nga giluwanan og doktor o health worker nga motubag og emerhensiya, drayber sa ambulansya o emergency vehicle nga nagpadung sa dapit diin dunay nahitabo nga disgrasya, drayber nga nagkarga og samaran nga tawo nga nanginahanglan og dinaliang medikal nga pagtagad, drayber nga nagmaneho og sakyanan nga iya sa Armed Forces nga alang sa opisyal nga katuyoan ug drayber sa sakyanan nga dunay gigukod nga kriminal.
Apil usab sa eksepsiyon ang law enforcement officer nga nagtinguha mo-overtake nga dunay dakpon nga nakalapas og mga lagda sa trapiko, drayber nga nagmaneho og sakyanan sa Fire Department nga motubag og alarma ug kon dunay very important persons (VIP) sama sa mga opisyal sa gobiyerno o dignitaries.
Si Alegado nidugang sa pagkakaron, traffic citation ticket (TCT) una ang giisyu sa ilang mga law enforcement officer gumikan kay wala pa sila maisyuhi og temporary operator’s permit sa Land Transportation Office.
Ubos usab sa Ordinance No. 27, gitugotan ang mayor nga makapalit og speed guns, speed enforcement cameras, speed limit signs ug maka-printout og TCT gamit ang pundo sa lungsod. (SCG)