Pagkalibang sa dili tukmang dapit sa Sibonga dunay multa, silot

PAHIMANGNO alang sa mga tawong magpasagad og pagawas sa ilang hugaw sa mga publikong lugar.

Ang kagamhanan sa lungsod sa Sibonga mosilot ug mopahamtang og multa niadtong mga tawo nga masakpan nagpasagad og kalibang sa bisan asang lugar labi na sa mga publikong dapit.

Ubos sa Section 4 sa Ordinance No. 10-2018-96 kun Ordinance on Zero Open Defacation, apil sa gidili ang paglabay, pagbilin o pagbutang sa hugaw sa tawo sa bisan asang lugar ug ang kapakyas nga walay pansayan sa mga balay sa Sibonga.

Ang open defacation nagpasabot ang pagpagawas sa hugaw sa tawo sa bisan asang mga dapit gawas sa mga pansayan o comfort room o rest room nga makadaut sa kalikupan.

Sa ordinansa, ang masakpan makahimo niini pamultahon og P500 ug/o pahimuon og community service sa nahitungdan nga barangay sa unang paglapas.

Pabayron og P1,000 nga multa ug/o tulo ka adlaw nga community service sa barangay o mag-agad sa hukom sa korte sa ikaduhang paglapas.

Samtang P2,500 sa ikatulong paglapas ug kon wa gihapon magpahimo og pansayan ang usa ka panimalay human sa unom ka buwan nga gihatagan og notisya.

Gawas sa multa ug silot, ubos sa Section 7 sa ordinansa, gimando usab ang pagtukod og Barangay Sanitation Control System sa mayor.

Kini langkuban sa barangay kapitan isip chairman, barangay midwife isip vice chairman, kagawad nga pangu sa committee on health ug barangay health workers isip mga miyembro.

Aduna usab itagana nga pundo sa ordinansa ubos sa Municipal Health Office alang sa pagpatuman sa mga programa, proyekto ug mga kalihukan sa maong katuyoan sud sa usa ka tuig.

Ang ordinansa ipatuman alang sa tanang tawo, molupyo o dili sa lungsod basta ubos sa ilang hurisdiksyon.

Niadtong Nobiyembre 5, 2018, giaprobahan ni Sibonga Mayor Caroline Bacaltos ang ordinansa apan pagka Pebrero 11, 2019 naaprobahan sa Sangguniang Panlalawigan sa Sugbo human pirmahi ni Bise Gobernador Agnes Magpale base sa rekomendasyon sa committee on public health and social services nga gipangulohan ni Prov. Board Member Jose Mari Salvador. (SCG)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph