UPAT ka mga bombero sa Sugbo ang mipaubos sa advanced Chemical, Biological, Radiological and Nuclear Emergency (CBRNE) sa Estados Unidos o US sulod sa dul-an duha ka semana.
Ang US-government sponsored training sa Colorado naglakip kini sa Tactical Combat Care Course diin giandam ang mga bombero sa posibilidad nga kalamidad nga posibleng moigo sa nasod.
Ang United States Defense Threat Reduction Agency mao ang niimbitar sa mga bombero diin naglakip kini sa pangu sa Search and Rescue Unit (SRU) sa Bureau of Fire Protection (BFP) 7 ug Toledo City Fire Marshal SInsp. Paul Patrick Laude.
Matod ni Laude nga nagsugod ang maong training niadtong Pebrero 4 ug nitapos niadtong Pebrero 15.
Upat ka mga bombero ang gikan sa Sugbo lakip na usab ang gikan sa Cebu City Fire Station ang gipadala diin naglakip kini nila ni FO2 Jay Joseph Payot, FO2 Christian Felix Bargayo, FO2 Kate Christian Sigue ug si Laude.
Inubanan nila ang laing 24 ka mga bombero sa nasod diin nipaubos usab sa maong training.
Gikan sa maong training, ilaha kining ipaambit usab sa ubang mga bombero sa nasod aron mahibawo ang bombero kon unsaon pagdala sa maong klase sa kalamidad sa panahon nga mahitabo kini sa nasod.
“New skills and techniques in reponding to HME o home made explosives and tactical combat care. Mao na ang bag-o nga i re-echo namo sa Philippines apil na pud ang advanced hazmat life support in preparation napud sa June nga big exercise,” matod ni Laude. (HBL)