GIAWHAG sa Cebu Provincial Commission on Elections (Comelec) ang mga Sugbuanon nga pahimuslan ang vote counting machine (VCM) roadshow nila dinhi sa Sugbo.
Kini aron masinati na daan ang kahimanan nga mao gihapoy gamiton alang sa May 13, 2019 elections.
Matod ni acting election supervisor Atty. Jerome Brillantes, nga gitumong ang roadshow alang sa pag-edukar ug paghatag ug ideya sa mga botante kung unsaon kini paggamit ug dili na sila maihas inig abot na sa adlaw sa piniliay.
Nabantayan sa Comelec ang menus ra kaayo nga nipahimulos sa ilang VCM roadshow sa dakbayan sa Mandaue, ilabi na niadtong Pebrero 12, diin gihimo kini sa Mandaue City Sports Complex.
Karong adlawa, Pebrero 18, maoy katapusang adlaw niini diha gihapon sa maong venue ug gusto sa taga-Comelec nga mas daghang tawo ang makasuway paggamit sa kahimanan.
Sigun ni Brillantes, gawas sa Mandaue City, dalhon usab sa Comelec sa ubang dapit dinhi sa probinsiya sa Sugbo ang VCM roadshow alang gihapon sa educational campaign sa Comelec.
“Sa amo nang campaign for educational (purposes), paghatag ug background sa mga tawo pagkat-on sa VCM, educational campaign,” niingon si Brillantes nga maayong familiar nang daan ang mga botante sa ekipo aron mas paspas ang dagan sa botasyon sa adlaw sa mid-term elections karong Mayo 13 ning tuiga. Unang gisugdan ang VCM roadshow dinhi sa Sugbo niadtong Enero 26 ning tuiga. (AZLG)