Pakigpulong sa mga politiko atol sa graduation rites gidili: Dagatan

GIDILI sa Department of Education (DepEd) Cebu City Division ang mga pulitiko nga makapamulong atol sa graduation ceremonies.

Apan giklaro ni Superintendent Bianito Dagatan sa DeEd Cebu City nagpaabot pa sa pormal nga kamandoan gikan ni DepEd Secretary Leonor Briones.

“We will wait for the formal communication nga ma-receive namo (sa DepEd Cebu City) and we will follow the order,” matod ni Dagatan sa interbyu sa Superbalita Cebu.

Una niini, si DepEd Undersecretary Nepomuceno Malaluan niingon nga ila pang i-discuss atol sa executive committee meeting human nisugyot si Atty. James Jimenez sa Commission on Election (Comelec) nga dili padiskursuhon ang mga pulitiko sa recognition ug graduation rites sa mga tunghaan.

Si Dagatan niingon nga kon aduna nay memorandum, iya kining ipadala ngadto sa mga district supervisor dayon ngadto sa mga principal aron adunay giya ang mga magtutudlo sanglit nabatasan na sa mga eskwelahan nga imbitahon ang mga kasamtangang opisyal sa Local Government Unit atol sa graduation.

Apan si Jimenez niingon nga wa mabutang sa guidelines sa Comelec nga gidid-an ang mga pulitiko sa pagtambong sa maong kalihukan ug siya nanawagan aron usab dili mapahimuslan sa mga magpapili ang nahisgutang aktibidad.

Ang campaign period sa mga magpapili sa pagkasenador ug partylist representative nagsugod niadtong Pebrero 13, 2019.

Samtang sa pagka gobernador, mayor, kongresista ug ubang lokal nga kandidato magsugod karong Marso 29 ning tuiga.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph