5-anyos kulatado, inahan ‘gisikop’

USA ka inahan ang ‘gidapit’ sa buhatan sa kapulisan human bun-oga ang iyang 5-anyos nga anak sa Sitio Kimba, Barangay San Roque, siyudad sa Talisay niadtong Sabado sa hapon, Pebrero 16.

Nasayran kini human gi-post ang video sa pagpanapat sa inahan sa iyang anak ngadto sa social media ug kini nag-viral sa Facebook.

Sigon ni Jennifer Deljero, 36, usa sa mga ni-video ug ni-post sa Facebook nga ang inahan niapas sa bata kay duha ka adlaw na kini wala mouli sa ilang balay.

Dugang niya nga ang bata di na ganahan mouli sa ilang panimalay tungod kay giingong kusog mangulata ang mama.

“Iyang giapas sa internetan ang bata ug iya daw gibunalan unya gikumot ang buhok. Ang bata nidagan man sa may tabay. Mao na diha sa tabay, diha man mag-anhaan ang bata unya naligo man ko didto gikan. Pagkahuman nakog ilis, akong nakit-an nga gadala siya og bunal,” saysay ni Deljero.

Usa ka putol nga sanga ang gihimong bunal sa inahan ug kini iya pang gigukod padulong sa tabay kon asa permi mag-adtoan ang iyang anak.

Naay niuwang sa inahan sa pagpanapat sa iyang anak apan dali-dali kining gipasulod sa ilang balay ug kini nanirado. Apan ang mga silingan gisulod ang panimalay niini arong kuhaon ang bata.

Si Lelia Puerto, silingan nga maoy daganan sa bata kon kini bunalan sa iyang inahan, niingon nga gisugo ang bata sa iyang inahan pagpalit og tambal ug kini nasuko sanglit wala na kini niuli sud sa duha ka adlaw.

“Katong unang gabii, gisugo na siya palit og tambal. Pagsugo niya sa bata, wala naman nauli og duha ka adlaw. Pero daan naman na nilayas siya, lima ka adlaw kay gibunalan sad siya,” sigon niya.

Saysay niya nga gisugo sa inahan ang iyang anak pagpalit og tambal para sa hilanat niini sanglit dili na kini makabarog apan wala kini niya hatagi og kwarta ug gabii na kaayo.

Ang bata mohawa sa ilang panimalay ug moadto ngadto kang Puerto kon kini anaay problema sa ilaha.

Kini magpalaban ngadto niya ug mosumbong sanglit dapatan sa inahan ang bata kon kini dili mosugot kon sugoon. Matag adto sa bata sa iyang panimalay aduna ni bun-og ug pinaakan sa inahan.

Dugang usab niya nga ang bata niingon kaniya nga kini gikapoy na sa iyang inahan ug di na gusto mouli. Mohilak kini kon iyang papaulion.

“Mohilak man siya kon akong papaulion. Hilak gyud siya. Niingon jud siya nga di lagi ko, Nay. Diri nalang gud ko. Gikapoy na gyud ko sa akong mama, Nay. Naluoy nalang sad ko niya mao to ari na lang nako gipakatug,” sigon niya.

Dili na makatarong og tug ang bata sanglit pirme pukawon gabiing dako aron suguon, dugang asoy ni Puerto.

“Ang sigeg balikbalik sa bata "nga di na gyud ko sa akong mama lage kay gikapoy nako." Mao to pagbunal niya gahapon (Sabado), niana gyud ang bata nga "di na lage ko nimo." Perti gyud gakos niya nako,” saysay niya sa Superbalita Cebu.

Ang mga silingan sa bata mao ang ninghatod ug ni-report sa barangay sa maong insidente. Sigon nila nga ila nang giplanohan nga kon dapatan pa sa among inahan ang anak, kini ilang kuhaan og video.

Ang inahan sa bata nagdumili sa paghatag sa iyang bahin ug iya kining gihimakak nga siya ang inahan nga anaa sa nag-viral nga video.

Ang houseparent sa inahan nga si April Amancia niingon nga kon kini ipasud nila sa prisohan ang maong inahan, kini mag-wild maong nakadesisyon sila nga kini anaa nalang sa ilang opisina ug ilang bantayan.

Anaa na karon sa kustodiya sa Department of Social Welfare and Services (DSWS) ang bata.

Ang ngan sa inahan ug bata gipugngan ning mantalaan.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph