HUMAN sa impresibong knockout nga kadaugan ni Dave Penalosa, porsigido ang uyoan niini nga si Gerry Penalosa nga paawayon na ang iyang pag-umangkon alang sa world title.
Niadtong Sabado, gitumba ni Dave (15-0, 11 KOs) ang Mexicanong si Marcos Cardenas (19-7-1, 15 KOs) og katulo sa fourth round sa main event fight sa Gerry Pens Promotion/ESPN5 boxing nga gipahigayon sa Skydome sa SM North Edsa.
Sa post-fight interview, gilitok ug gihagit ni Gerry si World Boxing Organization (WBO) world featherweight champion Oscar Valdez sa Mexico nga modepensa sa iyang titulo batok ni Dave.
“Kay nisaad man ko ni Dave (Penalosa) og world title, ako gyud ning tumanon,” matod sa kanhi two-time world champion nga karon usa na ka bigtime promoter. “Atong target si (Oscar) Valdez. Ako dayon ning lihukon. Kon masugot gani sila, I think nagkinahanglan si Dave og upat ka buwan nga ensayo.”
Sa tungatungang bahin sa first round naiphan sa referee si Cardenas human kini masukarap sa dihang naigo sa walop.
Sa sunod nga mga round, nagkagrabi ang sinukliay sa mga kumo sa duha tungod kay ning higayona, mibawos na man sab og pag-ataki unta ang Mexican fighter.
Apan diha na nagsugod sa ikatulong hugna nga naantimano ug nibarag si Cardenas nga nasabak sa upper cut ni Dave nga gisundan og usa ka right cross.
“Diha na ko nakabantay nga morag nasakitan siya sa third round. Mao to nga ako siyang gi-pressure sa fourth round,” padayag ni Dave.
Gipadayag ni Gerry nga iyang tanyagan og $150,000 si Valdez ug anhi sa Manila ipahigayon ang away.
Apan kon dili nila makuha sa tanyag si Valdez, hayan mangita siya og laing world champion nga andam modepensa sa titulo batok ni Dave.
“Kon dili mosugot si Valdez, bisan kinsa nga world champion nga available,” dugang ni Gerry kinsa hugot ang pagtuo nga hinog na ang iyang pag-umangkon alang sa world title.
Gipakita usab ni kanhi world light flyweight champion Johnriel “Cuadro Alas” Casimero ang kalantip ug kusog sa iyang unang away sa 118 lbs. pinaagi sa pagrapido sa haponanon nga si Kenya Yamashita.
Nabulit sa mga dugo ug bun-og ang nawong ni Yamashita nga perming maigo sa walop ni Casimero sa wala pa hunonga sa referee ang away sa 47 segundos sa ikaunom nga round.
Tungod sa grabing kabangog sa hapon nga nibarag ug nalup-og sa paghiabot sa iyang corner ug dali gilayon kining gitabang sa mga paramedics ug way langan nga gibutangan og oxygen.
ner nga miyango-yango agi og pakitag respeto ngadto sa mga tawo nga misaksi ug nalingaw sa iyang away.
Laing Penalosa ang impresibo usab nga mikutlog kadaugan sa maong card sa dihang gi-knockout ni Carl (14-1) ang Thailander nga si Watana Phenbaan sa 2:22 sa third round.
Ang sensational sa Lagawe, Ifugao nga si Carl James Martin (12-0, 11 KOs), ang midispatsar ni Petchcharghae Kokeitgym sa Thailand. (JBM)