SUKWAHI sa gituohan, parehong manuwa sila si New Orleans Pelicans center Anthony Davis ug Boston Celtics guard Kyrie Irving alang sa Team LeBron nga makigbatok sa Team Giannis sa gikaintapang NBA All-Star Game karong udto (RP time) sa Charlotte.
Adunay mga katahap nga dili makaduwa sila si Davis ug Irving ning kombatiha gumikan kay pareho kining nakasinati og angol dili pa lang dugay. Si Davis adunay bun-og sa wala nga abaga samtang si Irving sa iyang tuong tuhod.
Gipasabot ni Irving nga talagsaon ra kini nga kahigayunan diin ikauban niya’g duwa ang labing maayong mga basketbolista sa kalibutan hinungdan nga dili kini niya usikan kutob sa iyang makaya.
Nahilakip si Irving sa starters sa Team LeBron kauban sila si James sa LA Lakers, Leonard sa Toronto Raptors, Durant sa Golden State Warriors ug James Harden sa Houston. (AFP, ESL)