SECTIONS
Monday, March 25, 2019
SUPERBALITA CEBU

Sugilanon: Tattoo

APRONIANITO FERRATER MIRAMON

Talisay , Santander , Cebu

BISAN kon wala hatagig pagtagad ni Kyla kadtong nalabyan niyang mga batan-on nga sa iyang banabana nagpanuigon og diyes ngadto sa dose, aduna siyay katahap nga kadtong usa nga napikal maoy gisungog niadtong unom nga labihan nga nakatawa. Maoy ilang gihimong kingkoy. Sa laktod gi-bully.Nakapahinumdom kini kaniya kang Kyle. Ulitawo usab kini dihang tungod ba kaha sa kaikog o kahadlok o tungod ba kay tingali buotan nga pagkaanak naninguha nga makasakay sa hilig sa iyang mga katalirungan. Puyde pod nga tungod kay aduna siyay gitabunan nga kamatuoran maong napugos siya pagbuhat sa ingon. Grabe ang iyang kayod aron makakat-on sa basketbol ug usahay sa skateboard nga maoy hilig sa iyang mga barkada. Sa pagkatinuod lang dili gyud siya sport minded. Apan tungod sa unsa may potensyal nga nakita sa iyang amahan ug lakip na ang ubang mga tawo ngadto kaniya napugos siya og pamasin.

“Mga pipila ka tuig gikan karon aduna na unyay laing June Mar Fajardo sa PBA. Ug kini mao na unya si Dodong Kyle!” ambisyuso ug mapagarbuhong pulong sa iyang amahan ngadto sa iyang mga higala.

“Pagkugi gyu’g kat-on og basketbol, Dong, kay aron mahaw–as ta sa kalisod.!”ni Papa niya Jake ngadto kang Kyle.

Mao kining mga pulong ang nagtukmod kang Kyle aron pangahasan og subay ang badlis sa palad nga bisan ang iyang kumingking wa gani bisan gamay nga amor. Apan di siya gustong pakaulawan ang iyang amahan. Wala pa siya sukad mahinumdom nga gisupak niya ang mando ug kagustohan ni Papa Jake niya.Uban ang pamasin nga basin tuod ug mao kini ang pamaagi aron sila mahaw-as sa kalisod.Busa andam siyang isakripisyo ang tanan. Pugos niyang gigakos ang mga butang nga wala siyay hilig. Apan mao kini giingon dili gyud mapugos nga pabungahon og apple ang kaymito. Wala mo-resultag pagka masaaron ang mga kahago ni Kyle. Mao pa gani kini nagnudnod niya aron mahimong biktima sa ilang mga bugalbugal. Mapuno siyag mga kantyaw lakip na sa mga nanan–aw sa matag higayon nga naa siya sa basketball court. Unsaong siya man unta ang labing taas apan siya sab ang labing banga. Naa unta niya ang labing gikinahanglan sa maong paugnat sa kusog apan nahulog sa walay silbi.

“Kon ako pay naka-height og ingon niana, tua na ko ron sa PBA,” matod sa usa sa mga gianugnan kaniya.

Wala magpa-apekto si Kyle niini. Padayon ang iyang kayod. Mi-undergo siyag mga training sa pipla ka basketball clinic. Mi-try out sa mga eskuylahan. Apan pakyas siya.

Samtang naglingkod nga nag-inusara si Kyle karong gabhiona nabug-os ang iyang hukom.Di na siya maningkamot alang sa ambisyon sa iyang amahan.Maoy tumanon niya ang mando sa iyang kasingkasing.

Sulod sa iyang kuwarto labihan ang kalipay nga sagol kahikurat ang iyang gibati. Nakita niya sa samin ang iyang bayhon. Dili na bayhon ni June Mar Fajardo ang miamag sa samin kundi kaamgid na ni Catriona Gray. Unya misuway siyag rampa sinundog ang lava walk ni Catriona samtang nagsul- ob siya og long gown. Daw hibatyagan niya nga ingon og naa siya sa cloud nine sa gibati niyang lahi nga kahimuot. Hibatyagan niyang daw sa adunay hinalwang salampati nga nakabuhi gikan sa iyang dughan. Pagka taudtaod iyang gitan-aw ang ‘tattoo’ sa iyang bukton nga maoy gi-sepra ang iyang ngalan nga Kyle. Nakapahiyom siya nga naghunahuna nga ugma adtuon niya ang ‘shop’ sa iyang suod nga tattoo artist aron ipausab ang katapusan niining letra nga ‘e’ ngadto sa letrang ‘a.’ (KATAPUSAN)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!