Barrita: Duha ka libo
MAO kana ang kantidad nga gikatahong maoy gidawat sa mga mamumuno sa magtutudlo nga si Romeo Duran nga gipusil ug gipatay atubangan sa iyang mga tinun-an didto sa Binlod, Argao.
“Bisan og pila, modawat gani kuno sila og P2,000 or P3,000,” sumala pa ni Supt. Erson Digal, Cebu Provincial Police Office Director. Pastilan, duha ka libo lang ang bugti sa kinabuhi sa usa ka tawo.
***
Nailhan na sa kapulisan ang upat ka mga tawo nga nahilambigit sa pagpatay kang Romeo Duran ug nasikop na gani ang usa kanila.
Kinahanglan nga lutuson ug sikupon silang tanan ug patubagon sa salaod nga ilang nahimo.
Di lalim nga diha pa gyud sa atubangan sa iyang mga tinun-an nga Grade 6 pa intawon. Mga lamhad pag pangisip ug nakasaksi na sa usa ka linuog nga binuhatan.
***
Nahitabo ang pagpamusil diha sa sud sa tunghaan samtang gipatuman sa Commission on Elections (Comelec) ang gun ban nga istrikto kaayo kay bisan ang pulis nga di mag-uniporme di man makadala sa iyang pusil.
Ang mga kriminal yano kaayong mamusil.
Asa na man diay ang mga checkpoints sa kapulisan?
***
Masaligon si Kong. Tony Cuenco nga mahinayon gyud ang plebisito karong Marso 13 alang sa pagmugna sa bag-ong barangay nga pagatawgon og Englis-Banawa.
Matod pa ni Kongresista Cuenco, gipagawas na ang P1.458 milyunes nga pundo alang sa maong plebisito.
Ang pagahimuong bag-ong barangay duha ka mga dagkong sitio sa Barangay Gudalupe, ang labing dakong barangay sa Syudad sa Sugbo.
Usa ray pangutana sa maong plebisito – uyon o di ba ang taga Guadalupe sa paghimo sa bag-ong barangay.
***
Way nakitang problema si Cebu City Mayor Tommy Osmena sa kakuwang sa tubig dinhi sa mga urban areas sa syudad tungod sa El Niño.
Ang hayan nga dunay problema mao ang mga umahan sa mga bukirang barangay.
Apan angay gyud nga magdaginot kita sa tubig. Pero wa na magpasabot nga magdungan mog kaligo sa inyong katabang.
***
Gisaway ni Mayor Osmeña kadtong namuyo sa mga upland areas sama sa Busay nga way tubig unya moreklamo nga napakyas ang syudad sa paghatag nilag tubig.
“Nindot ang lugar, nindot ang view, so motukod sila didto. Human mosyagit sila tagai kog tubig bi. Nganong mohatag kog tubig nga naa may tubig sa ubos,” matod sa mayor.
Bitaw, nganong adto gyud puyo sa ibabaw nga way tubig?
Na hala, panganaog mos ubos. Pero asa man mo papuy-a sa mayor, adto sa mga yuta sa probinsya?
r