UYAB ni Ashley Abad nga si Nel Spencer Tiu, kinsa nagmagahi sa pagkooperar sa imbestigasyon sa kapulisan sa kamatayon sa iyang hinigugma, nipatim-aw na sa Cebu City Police Office (CCPO) niadtong Miyerkules, Pebrero 13.
Siya nanghimakak nga aduna siyay kalabutan sa kamatayon sa dalaga.
Matod ni Police Regional Director Chief Supt. Debold Sinas, gi-interview gilayon sa mga imbestigador si Tiu.
Si Abad namatay sa overdose sa party drug nga gituohang Ecstasy.
Hugot kining mihimakak nga aduna siyay kalabutan sa paghatag sa illegal nga drugas sa iyang hinigugma nga una nang gidudahan nga gikan kini niya.
“Actually we are about to finish the investigation of Ashley Abad. Katong uyab si Nel Spencer Tiu kauban iyang parents iyang mother ug father, nagpakita na kay (Sr. Supt. Royina) Garma, and he was initially interviewed. Tapos he denied everything,” matod ni Sinas.
Apan bisan pa man niini, hapit na mahuman ang imbestigasyon sa kapulisan sa Siyudad sa Sugbo sa maong kaso.
Ang ilang kuwang mao nalang ang pagpasaka og kaso sa mga personalidad nga dunay kalabutan sa kamatayon sa dalaga.
Giangkon ni Sinas nga di pa nila mabutyag kinsa kining mga personalidad nga mapasakaan og kasong homicide o kaha reckless imprudence resulting in homicide. Apan aduna na silay duha ka mga tawo nga gitan-aw sa pagkakaron.
Usa sa ilang gipangsusi kon aduna bay basehanan sa pagpasaka og kaso ilabi na nga pulos mihimakak ang mga kauban ni Ashley nga nasayod sila kinsay naghatag sa illegal nga drugas.
Matod ni Sinas nga adunay tawo nga naghatag kanila og impormasyon kon si kinsa ang naghatag sa Ecstasy kang Ashley.
Di pa nila ikabutyag sa pagkakaron kon si kinsa kini.
“Naa lay gitug-an nga mga pangalan pero dili pa namo pwede i-reveal. Naa na mi gitan-aw pero dili pa pwede i-reveal kasi wala pay basis. Dili personal account pa,” dugang ni Sinas.
Nahuman na usab sa pagkuha sa ilang mga pamahayag ang mga higala ni Abad nga kauban nga mitambong sa usa ka concert party niadtong Enero 20.
Andam nila nga buhian ang imbestigasyon kon way basihan ang pulis nga adunay foul play sa kamatayon sa dalaga.
Apan kon makita nila nga gihatagan ang biktima sa illegal nga drugas ug matumbok na kinsa kini, ipasaka na nila ang kaso.
Niluwat na usab og pinanumpaang pamahayag ang mga ginakanan ni Ashley ug andam mopasaka og kaso.
Tungod sa pagpakita na ni Tiu sa kapulisan alang sa pag paubos kaniya sa imbestigasyon dili na modangop ang PRO 7 kang PNP Chief Oscar Albayalde alang sa subpoena power.