GISUBHAN na ang katukuran sa balor P1.3 billion nga high-rise building sulod sa Capitol compund nga mao ang Cebu Provincial Resource Center.
Full force silang Gobernador Hilario Davide III, Bise Gobernador Agnes Magpale, Provincial Administrator Mark Tolentino, ug mga department heads ug ang mga tinugyanan sa Development Bank of the Philippines, WT Construction Inc., ug AS Enriquez Engineering Consultancy sa gipahigayon nga groundbreaking ceremony sa Cebu Provincial Resource Center.
Ilang gilubong ang time capsule nga nagtinir sa plano sa tukoron nga edipisyo diha mismo sa site nga pabarugan niini, kilid sa Capitol executive building.
Sa hamubo nga programa pinasubay sa groundbreaking ceremony, gipadayag ni Davide nga taliwala sa mga kontrobersiya ug mga pagsaway nga naangkon niya ug sa Kapitolyo sa planong pagpatukod sa highrise nga edipisyo, karon wala na’y makapugong niini.
Nagpasalamat ang gobernador sa DBP sa pagpahulam niini ug P1.5 billion nga pondo aron mapatukod ang resource center.
Gihulagway niya nga “best deal” ang nakuha sa Kapitolyo gikan sa maong bangko kay anaa lang sa 2.9 porsyento ang interes nga kinahanglang bayran matag tuig sulod sa 10 ka tuig.
Subling gipdayag ni Davide nga dili alkansi niini ang Provincial Government ug dili sab mabulos sa pag-bayad ang mga magbubuhis nga Sugbuanon kay himuon man kini nga income- generating, diin mayoriya sa mga bahin sa edipisyo ang paabangan.
“Most of these spaces will be leased by private or even public corporations or individuals maybe, aron mo-earn pud ni ug income and we will be able to pay our loan with DBP without burdening the Cebuano taxpayers. According to our Finance Committee, kung duna man gani taxpayer’s money nga ma-involve niini, minimal ra kaayo and kaayo ra kaayo na nato,” niingon si Davide.
Sa nasayran, sayo niining buwana hingpit na nga nahatag sa Kapitolyo ug Notice of Award sa proyekto ngadto sa WT Construction ug napirmahan na usab ang notice to proceed ug kontrata alang niini.
Nagpasalamat usab si Davide sa mga sakop sa Hunta Probinsiyal, taliwala sa ilang pagkabahin-bahin sa desisyon pagsuporta sa katukuran sa proyekto tungod sa naklaro na nila nga linya sa politika.
Si Magpale, sa iyang bahin, dako ug pagsalig nga nasubay sa insakto ug lehitimong proseso ang planong pagtukod sa Provincial Resource Center ug alang niya, panahon na nga hatagan usab ug credit si Davide sa tinguha niini nga magasahan ang mga Sugbuanon sa maong proyekto.
“Have you heard of an overpriced building, a substandard building nga nahimo sa administrasyon ni Gob. Junjun Davide? I can not blame the Cebuanos because I have seen it all, projects that have been built substandard costoing almost a billion pesos,” padayag ni Magpale.