DUL-an sa 200 ka mga pulis sa Mandaue City Police Office (MCPO) ang gipaubos sa surprise drug test Lunes sa buntag, Pebrero 18, isip kabahin sa nagpadayon nga internal cleansing sa ilang han-ay.
Samtang aron mas ma-montor ug matabangan ang matag pulis nga dili gyud matintal sa ilegal, ‘squading system’ ang gipasiugdahan sa MCPO sa matag estasyon.
Human sa flag raising ceremony sa MCPO grounds, wala na palakwa pa ni MCPO director Julian Entoma ang mga pulis nga anaa sud sa headquarters bisan na ang mga hepe sa kada estasyon ug nagkadaiyang unit.
Sila tanan ang gipahiubos sa unang random drug test sa MCPO ning tuiga.
173 ka mga pulis ang napaubos, ug nangulo niini si Entoma. Pebrero 19, pa masuta kon aduna ba kanila nagpositibo sa drug test.
Gipasabot ni Entoma nga nakig-alayon siya sa Pro-7 crime laboratory, alang sa pagpahigayon sa surprise drug test, isip kabahin sa nagpadayon nila nga paglimpyo sa ilang hanay gikan sa mga buluyagon nga pulis, ilabi na niadtong’ nalambigit sa ginadili nga drugas.
Matud ni Entoma nga kon makaya lang unta sa crime lab, mohimo gyud sila dili lang quarterly nga drug test, apan ika-lima o ika-unom sa usa ka tuig.
Hinuon, dako ang iyang pagsalig sa kapulisan sa MCPO, human wala ra usab siya nadunggan nga mga nagpabadlong nga sakop.
Apan alang kang Entoma nga mas maayo na usab nga adunay makapahinumdom kanila sa ilang gipanumpa diha sa ilang pagsud sa serbisyo isip usa ka pulis, hinungdan nga ila na usab nga gisagop sa MCPO ang ‘squading system’.
Gipasabot ni Entoma nga gawas sa ilang mga hepe o pangulo sa kada unit, anaa usab sila duha ngadto sa tulo ka team leaders, nga maoy momonitor sa mga lihuk sa kaubanang mga pulis, trabaho o personal man.
Anaa usab ang sinemana nga open forum, aron mo-evaluate sa ilang mga nahimo diha sa pagpanarbaho sa maong semana, makorehian ug matambagan kon adunay wala nagkadimao.
Sa mao usab paagi nga giagni ang matag pulis nga mopadayag sa ilang problema mapa-personal, kalabot sa pamilya, kwarta ug uban pa man, aron usab matabangan sa grupo, ug kon kinahanglan, matabangan sa ilang hepe, hangtud na sa direktor.
“For example diha sa mga PO1, PO2, naay senior nila, mga nag ranggo og SPO4 o SPO3 nga maoy motindog isip team leader nila, monitoron sila, kon basin adunay lapses diha sa pagpatuman sa operation, sa mga gipang-send nga report, o bisan na sa kinatibuk-an nga pagpanarbaho, dili lang sa physical ba...,” pagpasabot ni Entoma sa Superbalita Cebu.
Matud ni Entoma nga una na kini nga gipatuman sa Cebu Provincial Police Office (CPPO) sa miaging tuig, gihimo usab sa CCPO ug karon gisugdan sa MCPO.
Ang mga team leader ang gipaubos usab og pipila ka eminar sama sa leadership, espirituwal nga aspeto ug uban pa.
Nanghinaut sila nga ning paagiha, wala nay pulis nga malambigit sa bisan unsang ilegal nga kalihokan sama sa pagpayuhot sa ilegal nga drugas. Ang resulta sa drug test mahibaw-an sulod sa pipila ka adlaw.