USA ka 33-anyos nga bayot nga giingong mangmolestiya og bata ang gidakop sa kapulisan niadtong Sabado sa hapon, Pebrero 16 sa Dakbayan sa Sugbo.
Inubanan sa sakop sa Women and Children Protection Center - Visayas Field Unit, nasikop sa kapulisan si Joey Michael Donozo kinsa anaa sa akto sa pagmolestiya sa 9 ug 14-anyos pinaagi sa pagbugaw niini sa usa ka langyaw.
Ang maong entrapment operation nahitabo pasado alas 5 sa hapon niadtong Sabado, sa usa ka fast food restaurant sa Barangay Lahug, Dakbayan sa Sugbo.
Daw gamiton sab sa suspect ang mga menor- de-edad nga lalaki.
Kuyog sa kapulisan ang social workers aron pag-rescue sa mga bata.
Nasayran nga base sa imbestigasyon, ibaligya usab ni Donozo ang mga hubo nga hulagway sa mga menor, online.
Subay sa maong operasyon gi-adto usab sa aotoridad ang silingan sa suspetsado aron pag-rescue usab sa upat pa ka mga lalake nga gigamit niini pagmolestiya.
Na-rescue ang upat ka mga lalake nga nagpangedaron og 12 ngadto sa 14-anyos.
Ang pag-aresto kang Donozo subay kini sa taho gikan sa Australian Federal Police ngadto sa kapulisan sa nasod.
“Young vulnerable Filipino boys were sexually exploited online and in person abuse just so a pimp could earn easy money selling the body and dignity of precious children. Praise God for the WCPC police unit that continues to courageously rescue children from the clutches of sexual depravity and send the arrested abusers and traffickers to jail to await justice for their crimes,” matod ni International Justice Mission (IJM) Field Office Director, Atty. John Tanagho.
Tambayayong sa WCPC-VFU ang Department of Social Welfare and Development 7, Inter- Agency Council Against Trafficking 7, Cebu City Police Office’s Special Weapons and Tactics, Women and Children Protection Desk, ug ang IJM sa maong operasyon.
Anaa na sa kustodiya sa DSWD ang mga na- rescue nga bata.
Kapsan sa Anti-Trafficking in Persons Act o Republic Act (RA) No. 9308, RA 10175 (Cybercrime Prevention Act of 2012) ug RA 9775 (Anti‐Child Pornography Act of 2009) ang pagpamugaw sa bata.
Mamahimong mapriso sa 20-40 ka tuig nga pagkapriso ang maatubang sa molapas niini.
Sukad 2011, niabot na sa 183 ka nga bugaw ang nasikop ug niabot na sa 429 ka mga biktima ang narescue lukop nasod base na usab sa datus sa IJM.