USA ka real estate agent ang nabalhog karon sa prisuhan sa Centro Police Station, human masikop atol sa Comelec checkpoint diha sa may dan Zuelig, sa barangay Centro, Dakbayan sa Mandaue, kagahapon sa kaadlawon.
Gihulagway usab kini nga bayot. Nakuhaan siya og upat ka medium pack sa gidudahang shabu. Laing 11 pa usab ka mga lalaki ang nasikop atol sa checkpoint.
Giila ang dinakpan nga si Daniel Young Jr., 32 anyos taga Barangay Duljo Fatima sa Dakabyan sa Sugbo.
Unang gisita siya human nga wala nag-helmet, lulan kini og habal-habal. Atol sa pagsita, nabantayan sa mga pulis nga wala kini mahimutang hinungdan nga gimanduan kini sa pagkuot sa iyang mga bulsa og ipagawas ang mga sulod niini.
Matud ni Police Chief Inspector Aldrin Villacampa, nga una susamag binandol nga papel nga kwarta lang ang gipagawas, apan sa dihang gipabukhad kini, anaa sa sulod niini ang upat ka medium pack sa gituohan nga shabu.
Hinungdan nga dali kini nga gisikop.
Giingon nga niangkon kini sa mga pulis nga magpahatud siya sa dakbayan sa Lapu-Lapu aron didto ihatud ang mga drugas.
“Bag-o nila ni nga modus ron, aron kunuhay dili dali mailhan, ang shabu, ibutang diha sa tunga-tunga sa gipangpiko nga kwarta, i-tape pa aron dili mahulog, kon dili gyud nimu ipabukhad, dili dayon nimu mabantayan.
Niangkon man siya nga bag-uhay ra daw siya nga tig-deliver sa shabu gikan sa Cebu City, padung sa Lapu-lapu,” gitug-an ni Villacampa.
Apan hugot nga gihimakak ni Young ang pasangil sa mga pulis, matud niya nga nakainum lang siya niadtong higayuna ug wala lang gyud misul-ob og helmet.
Dugang niini nga bisan ang paggamit sa illegal nga drugas, wala niya buhata.
“Dili gyud na tinuod, wala lang ko nag-helmet.. Wala ko kabalo kang kinsa to (nakuha ngashabu). Dili ko mogamit, manigarilyo lang ko. Nakainum lang sad ko ato,” panghimakak sa dinakpan.
Si Young lakip sa 12 ka mga lalaki nga nasikop atol sa Comelec checkpoint nga gihimo niadtong Sabado alas 10 sa gabii, Pebrero 16, hangtud na sa ala una, Domingo sa kaadlawon (Pebrero 17) sa dalan Zuelig, Barangay Centro sa Syudad sa Mandaue.
Nakuha tanan sa kapulisan ang 15 ka mga gagmay nga pinakete sa shabu ug upat ka medium pack.
Gibana-bana nga mobalor tanan sa 11 mil pesos ang nasakmit.