Kabanay sa gipasanginlang drug personality nga namatay sulod sa Tuburan District Hospital nagplano karon paghimo ug legal nga mga lakang batok sa mga pulis nga nipahigayon sa anti-drug operation, diin siya napusilan ug batok sa mga tinugyanan sa tambalanan nga nikuha ug ni-upload sa video sa social media, makita nga naglisud ug wala atimana ang pasyente.
Samtang ang Secretary of Health naalarma sa nag-viral nga video ug nangayo sab ug report labot sa nahitabo.
Si Gob. Hilario Davide III sa iyang bahin, nipatawag sa mga nalambigit nga nurse, nga maoy gituohang nikuha sa video ug ni-upload niini sa social media.
Gilubong na niadtong Domingo ang giingong drug personality sa Lungsod sa Tuburan nga si Gembe Casas, nga una nang napusilan sa kapulisan atol sa giingong buybust operation niadtong Pebrero.
Siya sab ang susamang indibidwal nga gidala sa Tuburan District Hospital, diin siya matod pa wala atimana ug gikuhaan na hinuon ug video sa mga nars sa tambalanan ug gi-upload pa kini sa social media.
Si Atty. Vicent Isles sa Cebu Action Group miingon nga gi-abagan karon sa ilang grupo ang pamilya ni Casas, ilabi na kay interesado kini nga mosang-at ug kaso batok sa mga pulis ug sa Tuburan District Hospital tungod sa giingong kwestiyonable nga operasyon ug sa giingong wala dayon niini pagtabang sa pasyente hinungdan sa kamatayon niini.
Hinuon matod ni Isles, wala pay pinal nga desisyon ang pamilya ni Casas kay nibati kini ug kahadlok nga balikan sila ug
naglibog kung molungtad ba ang kawsa nila pagpangita ug hustisya.
“Medyo hadlok pud ang pamilya ba. Ila pu’ng gi-consider ang possibilities karon kung mo-prosper ba kay ug dili mo-prosper,
nganong maghago-hago paman ta. We are still keeping our options open,” niingon si Isles.
Ang tulo ka mga nurse nga una nang gisuspenso tungod sa nikatap nga video, gipatawag ni Gob. Davide sa Kapitolyo.
Wala makauyon ang gobernador sa ilang gihimo, ilabi na kay makita gyud diha sa video nga daw sa wala silay gibuhat aron tabangan ang pasyente.
“Mao na’y akong nalagutan. Nganong kuha-kuhaan paman ug video gud nang pasyente nga nag-antos na. People get the impressioon, kadtong nakakita na (sa video), nga wala atimana,” padayag ni Davide.
Nagpadayon karon ang imbestigasyon sa Provincial Health Office sa insidente nga nahitabo sa Tuburan District Hospital ug
padayong suspendido ang tulo ka mga job order nurses nga giingong nalambigit sa pagkuha ug pag-upload sa video.
Matod ni Provincial Health Officer Dr. Rene Catan, tungod kay dili regular nga mga kawani ang maong mga nurse, dili na mo-agi sa Committee on Discipline and Investigation (CODI) ang imbestigasyon batok kanila.
Ang worst-case scenario alang sa maong mga kawani mao nga mapasakaan sila ug kasong kalapasan sa Data Privacy Act ug apahukasan sa ilang lisensiya sa Professional Regulation Commission.
Gawas sa PHO, nakaabot na kang Health Secretary Francisco Duque ang isyu, kinsa nihatag na ug idkretiba sa DO7 nga kuha-on ang kumpletong detalye sa insidente.
Nakaduso na hinuon ug report labot niini si Catan ngadto kang DOH7 Director Jaime Bernadas.
“Worst-case scenario is naay mokaso nila because of the Data Privacy Act. It was beyond the call of their position to really
upload it kay kana lang ganing sa operating room mo-video ka, because naay operahan, makasohan ka, daghan na ang nakasuhan,” sigun ni Catan.