MAHIMO nang makapamasahero sugod karong adlawa ang mga electronic Jeep (E-Jeep) sa dakbayan sa Lapu-Lapu.
Kini human pormal nang gilusad kagahapong adlawa, Pebrero 18, ang 25 ka mga unit sa E-Jeep sa mga opisyales sa Land Transportation Franchising Regulatory Board (LTFRB) 7 ug Dakbayan sa Lapu-Lapu.
Matod ni LTRFRB 7 Director Eduardo Montealto nga ang pormal nga paglusad sa mga E-Jeep nagpasabot nga aduna nay pagtugot ang nahisgotang mga sakyanan sa pagpadagan ug pagpamasahero sa dakbayan.
P8 pesos ang pleti sa unang lima ka kilometro samtang P1 usab sa mosunod nga mga kilometro.
Kasamtangan unang manukad ang naasoyng mga E-Jeep sa merkado publiko sa dakbayan paingon sa nagkadaiyang rota sa dakbayan.
Kini sama sa Maribago, Punta Engaño, Marigondon, Babag ug lungsod sa Corodva samtang wa pa maaandam ang himuong terminal alang sa maong mga sakyanan sa usa ka luna nga gipanag-iya sa usa ka mall haduol sa Lapu-Lapu City Hall.
“Immediately magbiyahe na ni sila kay kompleto naman ilang papeles. Pareho ra sa PUJ ang pleti pero kita ang mokontrolar sa pleti,” matod ni Montealto sa pangutana kong kinsa ang makapasaka o makapaos-os sa pletihan sa naasoyng mga E-Jeep.
Samtang gibutyag ni Atty. Martin Delgra III, chairman sa LTFRB, nga gawas sa dakbayan sa Lapu-Lapu, plano nila nga imontar ang naasoyng mga matang sa transportasyon sa ubang bahin sa nasod.
Kini aron makatabang sa suliran sa polusyon nga maoy sagad problema sa mga dagkong syudad.
Sa samang higayon mapatuman ang moderinzation program ni Presidente Rodrigo Duterte tibuok nasod.
Gipasalig usab ni Delgra nga di hingpit nga wagtangon ang mga tricycle nga sagad nagbiyahe sa pipila ka mga dakbayan sa nasod sama sa Lapu-Lapu.
Tugotan silang makabiyahe sa mga dalan nga di biyahean sa mga E-Jeep.
Sa di pa matapos ang Abril, moabot na sa 100 ka mga E-Jeep nga magdagan sa dakbayan Lapu-Lapu nga mao unyay labing daghan sa usa ka dapit sa nasod.
“He is so passionate about public transport (Pres. Duterte)) nga daghan kaayo og gapila nga mga pasahero, kung naa may gapila, gasipong sa ilang mga baba ug ilong kay ngano man? Pollution mao nang those things that he is actually saying to push for the modernization program,” matod ni Delgra.
Sa balaud, ang mga traysikol gidid-an na nga makabiyahe sa national highway.
Anha ra sila tugtan nga makabiyahe sa secondary nga mga karsada, apan wa kini mapatuman.
Ang Lapu-Lapu dunay tricycle lanes.