PATAY ang usa ka lokal opisyal sa Maguindanao human kini gipusil didto sa siyudad sa Cotabato.

Kapulisan nag-ila sa biktima nga mao si Datu Erol Sinsuat, minyo, barangay chairman sa barangay Pinansaran Datu Blah Sinsuat ug ABC President sa maong dapit.

Sa report gikan sa Cotabato City Police Office nahitabo ang insidente alas 7:20 sa gabii, Pebrero 17.

Sakay ang biktima sa iyang motorsiklo padung sa paggawas sa iyang pinuy-anan sa barangay Bagua Dos apan pag-abot niini duol sa Channing Restaurant sa Don Rabago Street giatangan siya sa duha ka wala mailhing mga suspek ug gipusil gamit ang M16 armalite rifle.

Patay dayon si Sinsuat kinsa natadtad sa mga bala ang nagkadaiyang parte sa iyang lawas.

Sa wala pa naka-iskapo ang mamumuno igo sab nga nakaresponde ang escort ni Maguindanao Acting Governor Bai Nareeman Ambolodto nga si PO1 Peptus Suella nga duol lamang sa lugar ug nakigpinusilay sa mga suspek nga sakay sa usa ka XRM nga motor.

Samdan si Suella sa iyang bukton samtang iya sab nga naigo ang usa sa mga mi-ambush kang Sinsuat.

Matud ni Cotabato City Police director Sr. Supt Willie Dangane nga duha ka mga anggulo ang ilang gisundan. Una, away sa politika ug ikaduha mao ang redo.

Gitahasan na ni Cotabato City Mayor Muslimin Sema ang kapulisan nga tutukan pag-ayo ang imbestigasyon sa pagpatay sa pag-umangkon sa iyang asawa aron kahatagan og hustisya ang pamilya sa biktima. (Edgardo Fuerzas)