NAILHAN na sa Digos City Police Office (DCPO) ang menor-de-edad nga nakit-ang wa nay kinabuhi didto sa maisang bahin sa dalang Roxas, Barangay San Miguel, siyudad sa Digos.
Si Chief Inspector Anthony Padua, hepe sa DCPO, nagbutyag nga ang gipatay mao si Joemar Abapo, 14 anyos, unang gihulagway nga nagpangidaron og 13-15 anyos.
Biktima, molupyo sa Patricia Village, Barangay San Jose sa siyudad.
Matod ni Padua, mismong ang inahan sa batan-on nga si Marnie ang niila sa iyang anak didto sa punerarya.
Nakit-an ang biktima nga nabulit sa daghang mga samad dinunggaban ang lawas, mga alas 6 sa sayong kabuntagon niadtong Pebrero 15.
Nakarekober ang kapulisan niadtong higayona og usa ka cellophane nga dunay sud sa gituohang rugby didto sa lugar diin napalgan ang biktima.
Nilutaw sa imbestigasyon sa kapulisan nga uwahing nakit-an ang biktima nga luwan sa usa ka kolor itom nga motorsiklo. Gikataho nga nalambigit sab kini sa usa ka riot sa mga gang.
Nanaghap ang mga otoridad nga sakop kini sa gang ug posibleng mao kiniy nag-unang motibo sa iyang kamatayon.
Sa pikas bahin, nasikop sa kapulisan sa lungsod sa Jose Abad Santos, si Romy Beto alyas Omie, 35, minyo ug taga Sitio Sabang sa samang dapit.
Si Beto ang nisibat niadto pang bulan sa Nobyembre human gitigbas patay ang mag-uumang si Winnie Dumaluyon, 34, minyo, molupyo sa Barangay Poblacion Big sa lugar.
Dungan niini giduso sab sa kapulisan niadtong Miyerkules ang kasong paglapas sa suspek sa Commission on Election Resolution number 8714 kun election gun ban. (Dondon Dinoy)