Migallen: Ang pagbalik ni Casimero

KOMPLETONG entertainment maoy nadalit sa boxing presentation nga giayudahan sa GerryPens Promotion ug sa ESPN5 niadtong Sabado didto sa Skydome sa SM City North Edsa sa Kaulohan.

Pero ang nakakuha og maayo sa akong atensiyon niadtong gabhiona mao si kanhi world champion Johnreil “Cuadro Alas” Casimero kinsa, sa unang higayon, miaway sa 118 lbs. batok sa promising fighter sa Japan nga si Kenya Yamashita.

Kon tapad lang ang tan-awon, dako ug baga si Yamashita kon itandi ni Casimero kinsa nakampiyon sa 112 lbs. ug sa 115 lbs.

Gikan pa gani sa sinugdanan nagsugod na si Casimero ug Yamashita og hinapsanay sa ilang tagsatagsa ka mga kinumo, pero akong nabantayan nga bisan unsaon og cover sa hapon ang iyang nawong, mawalis man sa walop ni Casimero.

Nabulit sa mga dugo ug bun-og ang nawong ni Yamashita nga perming maigo sa walop ni Casimero sa dihang gihunong sa referee ang away sa nahabiling 47 segundos sa ikaunom nga round.

Tungod sa grabing kabangog sa hapon sa nalup-og kini sa paghiabot sa iyang corner. Dali gilayon kining gitabang sa mga paramedics nga gi-oxygen.

Daghan man gud ang nagtuo nga nilabay na ang panahon sa lumad nga taga Ormoc City, tungod kay tagsa na kining makaaway.

Rason niini mao ang managerial dispute tali kaniya og sa Omega Boxing Gym nga, hinuon nasulbad na human gidesisyonan sa Games Amusement Board (GAB) pabor kaniya.

Sa gipakita ni Casimero niadtong Sabado, di ko masurprisa, kon ma-world champion siya og balik, kana kon dili malubag ang iyang pagdisiplina sa kaugalingon.

Pero yuna ra. Mora man diay og dunay laing problema si Casimero nga giatubang karon. Kini kalabot gihapon og managerial dispute sa iyang career.

Nakapirma diay ni siya og kontrata ni Morris East, katong Pinoy nga kanhi world champion, apan atoa karon nagbasehan sa Estados Unidos.

Sa niaging tuig, gipasaligan kini siya ni East nga paawayon sa US. apan sa unsa bang pagka unsaa, nga matod pa niya, mag-upat na lang ka buwan wa gihapon siya ka away didto hinungda nakahukom siya nga mosibat ug mouli na lang dinhi sa Pilipinas.

Kini maoy iyang sulbaronon karon kay gusto niyang putlon ang kontrata nga iyang napirmahan ni East, pero ang nakaapan kay wa siyay iyang kopya.

Usa ka tinubdan ang mibutyag nga nangayo og bahin si East sa iyang premyo niadtong Sabado. Ambot ug nahatagan, ba matod niya, di man gyud kuno siya mohatag.

Karon mobalik na siya ni Sammy Gelloani, ang iyang taodtaod na nga promoter. Si Gelloani, maoy usa sa mga responsabli sa iyang pagka world champion.

Gihangop ni Gelloani ang kalambuan ug iya karong lihukon kon unsay ayo sa iyang prodigal son. Iyang giingon nga wa gyud mananghid kaniya o mokonsulta si Casimero kalabot sa gibuhat niini aron unta iyang matambagan.

“Lahi ang amoa ni Casimero kay promotional man ang among kontrata. Wa mi contract sa managerial. Pero ngan lagi nga dugay na nato, atong tabangan kon dunay financial nga problema ang bata,” ni Gelloani.

Mitug-an si Casimero nga adunay abogado nga motabang kaniya niini. Sa pagkakaron, mopahuway lang una siya gikan sa iyang away, ug sa samang higayon mogahin og panahon sa iyang pamilya ilabi na nga aduna siyay baby.

Mao ni rason nganong moseryuso na siya sa iyang boxing career. Lahi na kaniadto. Well see unsay sunod ni Casimero. (junmigs0622@yahoo.com)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph