SA KAHINAY sa dagan sa trapiko diha sa lungsod sa Consolacion, nahimuot ko nga nakabasa sa balita nga mopahamtang ang mga opisyal sa lungsod og speed limit sa kadalanan.
Matod pa ni Consolacion Mayor Teresa Alegado, nga kuyaw alang sa mga pedestrian kon walay speed limit. Dayon ang ordinansa nagtakda nga ang speed limit gikan sa 20kph sa mga barangay road, 30 kph sa mga municipal road, ug 40 kph sa provincial road.
Ang nakaapan kay tungod sa kahuot sa trapiko nga wala masulbad sa lungsod sulod sa dugay na nga panahon kay kon di 5 kph ngadto sa 10 kph ang dagan, mag-standstill pa gyud.
Di ba angay una nilang pahapsayon ang dagan sa trapiko aron dili magkamang ang mga sakyanan nga moagi sa kadalanan niini?
Di lang baya mga taga Lacion ang napwerhisyo sa kahinay sa dagan sa trapiko labi na sa buntag ug inig sayo sa gabii. Kana kon di mag-standstill. Apil na sa nahasol kada adlaw ang mga silingang lungsod ug syudad.
DIGONG
Gibalita nga moanhi sa Syudad sa Sugbo si Presidente Rodrigo Duterte karong Pebrero 24 aron mokampanya alang sa mga senatoriable nga gisuportahan sa PDP-Laban.
Nasiguro ko nga magkabuang sab ang mga lokal nga mga kandidato sa PDP-Laban nga magpaisa sa kamot aron di na malalis nga sila ang opisyal nga kandidato sa administrasyon.
Angay lang nila panaminan tingale ang kasinati-an ni kanhi senador Jinggoy Estrada nga giisa na lang ang kamot kay naikog ang presidente nga naa man sa rali. Apan pagkahuman, iyang giklaro nga wala diay labot si Estrada sa official slate.
Gituohan nga ang rason ni Presidente Duterte nga wala giapil si Jinggoy tungod sa kaso niini. On bail pa baya kini kay naangin sa Napoles pork barrel case.
Nabalaka lang ko sa mga lokal nga kandidato nga dunay giatubang nga mga kaso. Likay lang ta.
Careful lang usab sa mga kandidato nga nalambigit sa listahan sa mga druglord protector.
Samtang saba na kaayo ang mga alyado ug tigsuporta ni kanhi mayor ug karon kandidato alang sa pagka bise mayor sa Syudad sa Sugbo si Mike Rama, wala pa baya gyud gibakwi sa presidente ang gipamulong niini nga siya druglord protector.
Ambot lang sab ni si Presidential Assistant Mike Dino nga wa man gyud makapa-usab sa pamahayag sa presidente. Di maayo nga ang ka-tandem sa PDP-Laban candidate alang sa pagka mayor sa Syudad sa Sugbo nga si Edgar Labella giisip ni Digong nga usa ka druglord protector.
Ngil-ad gyud kaayo alang sa tibuok grupo.
Wa man gikulbaan si Konsehal Jun “Way Kulba” Alcover, apan angayan ba kaha siyang magpakita uban sa Partido Barug nga sa ka-oposisyon niini kang Digong, gideklarar man gani kining persona non-grata didto sa Syudad sa Davao? (@anol_cebu sa Twitter)