NAUSAB. Maayo kay nausab ang hunahuna sa 21 ka magtutudlo sa mga public schools sa San Fernando nga di na unta motrabaho sa adlaw sa piliay sa Mayo 13, 2019 tungod sa kakuyaw sa kahimtang sa maong lungsod human gi-ambush ang sakyanan ni Mayor Lakambini Reluya diin nasamdan siya apan patay ang iyang bana ug duha ka kauban.
Modayon na sila og serbisyo sa Mayo 13, adlaw sa eleksyon, tungod kay gipasaligan sila sa kapulisan ug sa Commission on Election (Comelec) sa ilang seguridad sa adlaw sa piliay. Kinsay di tuod mahadlok nga bisan wa pa mahitabo ang maong ambush ni Mayor Reluya gideklarar na nga election hotspot ang San Fernando.
Kadto maoy unang bayolente nga panghitabo sa Sugbo sa nagkaduol nga piliay. Bisan tuod didto sa dakbayan sa Talisay nahitabo ang pagbanhig kang apan way lain kadudahan kon dili ang iyang kaatbang sa pulitika. Hinuon, nangugat og panghimakak sa maong hitabo si Ruben Feliciano, ang kaatbang ni Reluya pagka-mayor.
Ang San Fernando usa sa mga gamay nga lungsod dinhi sa Sugbo. Apan daghan ang di makatuo nga matag eleksyon pirmi kini ideklarar hotspot. Daghan ang nahibung, lakip nako, nganong init kaayo ang mga pulitiko wa man untay dakong negosyo nga angayan nga paga-ilogan.
Sa pag-angkon ni Franz Sabalones sa pagsugod sa administrasyon ni Presidente Duterte nga usa siya sa mga drug lord sa Sugbo nga nagbasihan sa San Fernando, dili ikahibung nganong init ang maong lungsod panahon sa piliay. labina kon ang usa sa mga kandidato suportado sa giingon nga drug money.
Apan kon wa ko masayop mora og walay gihinganlan si Presidente Duterte nga pulitiko sa San Fernando nga drug protector. Bisan pa niini dili angayan nga magkumpiyansa ang taga San Fernando. Ato na lang ipanghinaut nga walay dautan mahitabo atol sa piliay lakip na ang tanan dapit labina sa Mindanao.
•••
AYUDA. Dako kaayo ang hinabang nga madawat sa 80 ka barangay sa dakbayan sa Sugbo. Matud pa sa taho, P400 milyunes ang ihatag sa dakbayan pinaagi sa Association of Barangay Councils (ABC), nga ang presidente si Kasambagan Brgy. Capt. Franklin Ong, nga naglingkod nga ex-oficio councilor sa Cebu City Council.
Daghan na ang nagduda nga kini usa ka pamulitika tungod sa naghingabot nga Mayo 13 nga piliay.
Gisalikway ni Ong ang mga pagsaway. Matud pa ni Ong nga kon dunay buhaton ang administrasyon dudahan nga pamulitika ug walay buhaton moingon sad ang mga kritiko nga wa silay nabuhat. Konsehal Ong ingon ana jud ang dagan sa pulitika: dunay makauyon ug dili sad mouyon.