GIKATAKDANG mopagawas ang kagamhanan sa dakbayan sa Sugbo og P400 million alang sa financial assistance sa 80 ka mga barangays. Matod pa ni Cebu City ABC President Franklin Ong nga ang tanang mga barangay makadawat og tag P5 million. Ang dakbayan misugod na sa pag-apod-apod sa unang laing hinabang sa 16 ka mga barangay nga naka-liquidate sa unang gihatag nga hinabang. Matod pa ni Ong nga ipagawas ang maong gahin sa dili pa magsugod ang campaign period sa local elections karong Marso 29.
Midepensa daan si Ong nga dili kuno pamulitika ang gihimo sa kagamhanan nunot ning nagsingabot nga eleksiyon kay ang tanang mga barangay makadawat man. Unsay dili pamulitika? Dili pamulitika sa imong mata. Ka-klaro kaayo ana. Kon dili pa pamulitika, nganong karon pa man nga panahon sa eleksiyon gipagawas?
Mao ni ang nakabentaha sa incumbent gumikan kay makagamit man sa resources o pundo sa kagamhanan sa ilang pulitikanhong interes. Ila lang ingnon nga alang kini sa mga proyekto sa katawhan. Kini aron nakita sa katawhan nga aduna silay mga mihuras nga nahatag og ang katawhan adto mobutar nila. Hinaot nga dili mapalit ang mga botante niining maong matang sa pagpangilad.
Tanan kunong mga barangay makadawat sa maong hinabang unya ang mga barangay nga ang kapitan dili kaalyado sa BOPK makadawat gyud kaha? Posibling adto kini ipaagi sa ilang mga Barangay Mayor’s Office (BMO) sama sa ubang hinabang.
Ambot nganong hangtod karon wala pa man masuspenso ang “kanhi laos nga pulitiko.” Sa kadaghan sa mga kasong administratiba nga giatubang niini sa Office of the President, nganong bisag usa wala gyud misaler. Mas maayo man god nga masuspenso aron patas o igwalis ang pulitikanhong away batok ni Vice Mayor Edgardo Labella kay dili naman siya makagamit sa pundo sa kagamhanan sama anang iyang gihimo karon. Morag dili na gyud ko mobilib ni Presidential Assistant for the Visayas Micahel Dino kon dili masuspenso kining “kanhi laos nga politiko” sa dili pa ang eleksiyon.(bobbygnalzaro@gmail.com)