SECTIONS
Sunday, March 24, 2019
SUPERBALITA CEBU

1-M target nga mabakunahan og tipdas sa Central Visayas

CEBU. Si Dr. Sophia Mancao (tunga), Chief Regulation Licensing Enforcement Division, niayuda sa pagtusok sa bakuna batok sa tipdas ni baby Erza Arriesgado, 7-ka-buwan, niadtog Lunes, Perero 18. (Amper Campaña)

DI MOMINOS usa ka milyon ka mga bata ang gitinguha sa Department of Health (DOH) 7 nga ilang mabakonahan sa Cenral Visayas (CV) gumikan sa outbreak sa tipdas sa tibuok nasod.

Si Regional Director Jaime Bernadas sa DOH 7 nagkanayon nga aduna silay igong suplay sa bakuna sa mga bata ug adunay contingency fund para mabakunahan ang tanan nga libre sa Central Visayas.

“Sa Central Visayas niabot ta og 7.5 milyon ka mga tawo ug kapin sa usa ka milyon ang mga bata. Andam ta ana og logistics ug bakuna para mahatagan ang kabataan,” padayag ni Bernadas.

Si Secretary Michael Dino sa Office of the Presidential Assistance for the Visayas (OPAV) niawhag sa mga ginikanan nga magpabakuna sa ilang mga anak ug dili angay mahadlok sanglit dili kini makamatay inay makapadepensa aron dili mataptan sa delikado nga sakit.

“Ang anti-measles nga vaccine wala pay namatay ani nga bata bisan usa kabuok palihog lang ipabakuna na ninyo ang inyong mga anak ug ayaw kahadlok nga adunay mahitabo sa inyong mga anak kay kami nga naa sa gobyerno mahadlok mi nga manghatag ninyo og vaccine nga makadaot sa inyong mga anak. And we will never allow that,” pag-awhag ni Dino atubangan sa mga inaha kagahapon sa Barangay Duljo Fatima.

Ang pangulo sa DOH 7 niawhag sa barangay heath centers ug mga provincial heath office sa kalungsuran nga moabli 24 oras para sa mga gustong magpabakuna.

Libre ang mga bata ug si Bernadas niingon nga ilang ilakip unya sa pagbakuna kadtong mga nag-edad og 15 anyos pataas sanglit delikado usab sila nga matakdan ug kadtong mga tawo nga wala pa makasuway og tipdas ug wala pa sab makatilaw og bakuna.

Ang DOH, pinaagi ni Secretary Francisco Duque, unang nideklarar sa upat ka mga rehiyon sa measles outbreak .

Ning bag-o, nideklarar na si Duque og nasudnong pagkatap sa tipdas ug si President Rodrigo Duterte mismo niawhag sa mga ginikanan nga pabakunahan ang ilang mga anak.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!