GUSTONG pakigkitaan ni Cebu Provincial Police Director Senior Supt. Erson Digal si Gobernador Gwen Garcia aron tukion ang kalabot sa giingong di na pagdawat og dugang mga priso sa Cebu Provincial Detention and Rehabilitation Center (CPDRC).

Si Digal niingon nga isip jailer si Gobernador Garcia, gusto niyang sutaon gikan kaniya kon unsa nga lakang ang ilang himuon aron masulbad ang maong suliran.

For updates from around the country, follow Sun.Star on Twitter

Matod niya nga makasugat gyod sila og problema kon di na dawaton ang mga piniriso gikan sa kalungsoran sa CPDRC.

Kini tungod kay adunay mga lungsod nga wa ganiy prisohan.

Kon duna man ganiy prisohan ang mga police station, di usab lig-on ug kuyaw nga maeskapohan.

Nagkanayon si Digal nga pipila lang ka mga lungsod dinhi sa Sugbo adunay mga prisohan nga gidumala sa Bureau of Jail Management and Penology (BJMP).

Si CPDRC jail warden Lito Gabuya sa sayo pa nipahibawo nga posibleng di una sila manawat og mga binilanggo.

Matod niya nga moabot na og 1,548 ka mga inmate ang naa sa sud samtang ang kapasidad sa pasilidad 1,600 lang.

Si Gabuya niingon nga mohangyo sila sa korte nga di lang una isud ang bag-ong mga binilanggo sa CPDRC kon mapuno gyud kini.