MAG-USA ka tuig karong Martes, Pebrero 19, human banhigi ang bise mayor sa lungsod sa Ronda, Atty. Jonnah John “Janjan” Ungab sa dakbayan sa Sugbo, napasakaan na ba og kaso ang mga responsabli sa krimen?
Ang Cebu City Police Office (CCPO) wa pa makapasaka og kaso.
Alang sa biyuda sa anhing bise mayor, Pearl Ungab, mokiha siya kon duna nay klaro nga follow up nga imbestigasyon sa mga posibleng suspek sa krimen sanglit gusto niini kadtong dunay kalambigitan sa pagpatay sa iyang bana ang manubag.
“Ang ako, ganahan ko maka-file ta og kaso kanang naay posibleng kalambigitan sa krimen. Kay maluoy sad ta sa tawo nga atong iamong-among sa kaso unya di diay sila,” padayag sa ginang dihang nahinabi sa Superbalita Cebu pagka Lunes, Pebrero 18.
Matod niya, kon dunay basehan ang kapulisan nga person of interest, siya nihangyo nga ipadayon ang follow up investigation.
“Di ko gusto laing inhustisya na sad,” pamulong ni Pearl. “Og wala koy hustisya makuha diri sa kalibotan, nag-ampo ko nga naay hustisya akong bana sa langit.”Duna sila’y unom ka mga anak ni Atty. John.
Kaso andam na
Giangkon sa mga imbestigador sa Cebu City Police Office nga andam na unta ang kaso nga ilang ipasaka batok sa mga suspek.
Matod ni SPO1 Winston Ybañez sa Investigation and Detective Management Branch nga nagpaabot sila kang Pearl kon kanus-a makahukom nga mopasakag kaso.
“Nagpaabot lang mi unsay desisyon sa pamilya ni Attorney Ungab kay ready naman ni among mga dokumento nga i-file ang kaso kay naa naman tay mga suspect ani,” matod ni Ybañez.
Usa sa mga suspek nga gitumbok ni Ybañez kadtong giingong napatay sa mga pulis sa syudad sa Lapu-Lapu nga si Dante Betaganzo.
Nitakdo ang armas nga maoy gigamit sa pag ambush kang Ungab sa dihang gipaubos sa ballistic exam sa PNP Crime Laboratory 7.
Aduna pay pito ka personalidad ang nailhan sa kapulisan nga lakip sa nagpatay sa abogado apan na dumili pagtug-an si Ybañez kon di pa nila mapasaka ang kaso.
Apan kon padayon nga mahadlok si Pearl nga mo file sa kaso, way mahimo ang kapulisan, matod ni Ybañez.
Si John gibanhigan sa duha ka armadong mga lalake samtang nagmaneho sa iyang Suzuki Ciaz car kuyog si Pearl sa North Reclamation Area, duol sa Qimonda Building Complex sa dakbayan sa Sugbo.
Gikan siya nitambong og husay sa iyang kliyente, self-confessed drug lord Kerwin Espinosa, sa mga kasong kalapasan sa Omnibus Election Code ug illegal possession of firearms niadtong 2010.
Dul-an pito ka buwan human ma-ambush si John, gipatay usab ang iyang uyoan si anhing Ronda Mayor Mariano “Nonie” Blanco III sud sa iyang buhatan sa munisipyo pasado ala 1 sa kaadlawon niadtong Septiyembre 5.
Modagan
Si Pearl, magpapili isip usa ka independente nga konsehal sa Ronda sa umaabot Mayo 13 nga eleksyon.
“Daghan man nag-aghat nako mga supporters sa akong bana nga palansaron ko,” butyag ni Pearl sa iyang pagdagan pagkakonsehal dungan sa iyang pagpanginabuhi alang sa ilang unom ka mga anak.
Karong alas 10 sa buntag, dunay ihalad nga misa alang sa unang death anniversary ni John sa pribadong mausoleum sa Ronda diin kini gilubong.
Si John nga mag 45 anyos unta niadtong Enero 4, 2019, nangandoy nga makapatukod og library sa Ronda uban sa abag sa Cebu Diamond Lions Club.
Kini ang hinungdan nga mag-fundraising si Pearl pinaagi sa pagpasiugda og fun run karong Marso 2 aron maghimo og foundation alang sa katumanan sa proyekto ni John ug sa mga damgo niini alang sa mga Rondahanon.