DI MAKAGAMIT sa Plaza Independencia karong Pebrero 24 ang partido Barug-PDP Laban human sila gibalibaran.
Kini ang gibutyag ni Konsehal Raymond Garcia sa Superbalita Cebu.
Unang nisugot si Dr. Librado Macaraya Jr., pangulo sa Parks and Playgrounds, dihang na-acting mayor si Bise Mayor Edgardo Labella sa miaging semana.
Si Garcia niingon nga nisugot na si Labella ug Macaraya.
Apan sa niaging duha ka adlaw, gipahibawo siya nga di makagamit ang Barug-PDP Laban sanglit gamiton ang lugar isip tipik sa venue sa Charter Day.
Sa mao nga adlaw, ipanghatag usab ang tag-usa ka sakong bugas ngadto sa 6,000 ka mga habalhabal drivers.
Sa maong adlaw usab, mobisita si Presidente Rodrigo Duterte aron iindurso ang ilang kandidatura diin iisa ang kamot ni Labella sa presidente uban si Kongresista Gwendolyn Garcia, kinsa magpapili pagka gobernador.
Gibanabana nga kini tambungan sa 60,000 ka mga supporter sa grupo ni Labella, kinsa magpapili pagkamayor.
Si Garcia, kinsa niingon nga iyang gi copy furnish si Osmeña dihang niadto sa Hawaii, niingon nga posible gituyo kini sa mayor sanglit sila kontra partido.
Gihulagway ni Garcia nga haom ang Plaza Independecia sa mga kalihukan nga naa ang Presidente sanglit luwas ang maong dapit. (PAC)