ANGAY lang gyud tuod nga manubag ang pulis nga sakop sa Mobile Patrol Group, ubos sa Davao City Police Office (DCPO), nga nagmaoy ug nagpabuto sa iyang armas niadtong milabay nga adlaw.
Wala ta makasabot kon nganong ingon niini ang gihimo sa pulis nga si Police Officer (PO) 1 Ronald Bryan Maneja nga unta kanunay man nagpasidaan ang mga opisyal sa Philippine National Police nga gidili ang sama niini nga buhat alang sa usa ka tinugyanan sa balaod.
Si PO1 Maneja gisumbong sa iyang mga silingan human nga nagpabuto sa iyang armas kay hubog samtang gikalalis, matud pa, ang iyang kapuyo.
Hinungdan nga daling miresponde ang Special Weapons and Tactics sa Talomo Police Station ug gidakop ang pulis.
Sumala ni DCPO Director Police Senior Superintendent Alexander Tagum gipadala na ang pulis ngadto sa Regional Personnel Holding and Accounting Unit ug mag-atubang siya og daghang mga kaso.
Ang usa ka pulis angay nga modelo sa pagsunod sa balaod diha sa katilingban ug di maoy manguna sa pagbuhat og dautan.
Mosugot man sila o dili, kinahanglan gayud nila kining himuon gumikan kay ang pulis man ang tigpatuman sa balaod.
Kon di siya makahibawo sa mosunod sa balaod, di sab siya angay nga mopatuman niini.
Tungod sa gibuhat sa maong pulis, nadamay ang dungog sa tibuok puwersa sa DCPO, busa angay lang nga atubangon niya ang linugdangan sa iyang gibuhat, nga posibleng makataktak kaniya sa serbisyo.