MAGSAYSAY, Davao del Sur-- Nadakpan sa kapulisan ang usa ka lalaking midayo pa gikan sa probinsiya sa Maguindanao aron ihatud ang mga gituohang drugas sa probinsiya.
Gihimo sa kapulisan ang paglit-ag sa suspek sa Barangay Kanapolo, alas 12:30 sa udto, niadtong Dominggo, Pebrero 17.
Nailhan ang suspek nga mao si Batan Kedsing Dilanggalin, 36, molupyo sa Tupak, Bulit, Pagagawan, Maguindanao.
Gamit ang marked money nga P3,000 nakuha sa kapulisan ang unom ka managlahing sachet sa gituohang shabu nga gibana-banang mobalor sa P10,000.
Si Chief Inspector Ivan Samoraga, hepe sa kapulisan sa Magsaysay Municipal Police Station, nagbutyag nga dugay ra nilang gipanid-an ang transaksiyon sa suspek.
Giangkon sa suspek nga upat ka higayon na siyang naghatud og druga sa Davao del Sur.
Apan, bugtong komisyon lamang iyang giapas tungod kay bag-o nanganak ang iyang asawa.
Sumala sa suspek nga aduna siyay P2,000 nga porsiyento sa matag P5,000 nga shabu nga iyang mahatud ug tungod sa kapit-os nahimo niya ang maong trabaho.
Gipriso na ang suspek samtang atubangon niini ang kasong paglapas sa Republic Act 9165 kun Comprehensive Dangerous Drugs Act of 2002.