COTABATO CITY-- Patay ang usa ka miyembro sa Philippine National Police samtang samdan sab ang iyang kauban human gipamusil alas 6:45 sa gabii niadtong Dominggo, Pebrero 17.
Giila ang namatay nga si Police Officer (PO) 1 Ali Bago Mama, 26, ulitawo, ug nagpuyo sa President Quirino, Sultan Kudarat.
Samdan sab ang iyang kauban nga si PO1 Jolace Alim Guiamad, 26, ulitawo, ug molupyo sa Datu Paglas, Maguindanao Province ug pulos nadestino sa City Mobile Force Company.
Sumala kang Cotabato City Police Office director, Superintendent Michael Lebanan nga sakay ang mga biktima sa XR-200 nga motorsiklo sa Yapsy Street, Barangay Rosary Heights 10, sa siyudad sa Cotabato, sa diha nga gipamusil sa wala mailhing mga lalaki.
Gisapupo ang mga samarong pulis sa mga sibilyan ug sa mga nagresponde nilang mga kaubanan ug gihatud sa Cotabato Regional and Medical Center apan gideklara sa mga doktor si PO1 Mama nga dead on arrival samtang grabe ang kahimtang ni PO1 Guiamad.
Daghan ang nagtuo nga posibleng dunay kalabutan sa gipalig-on nga kampanya batok sa ilegal nga drugas ang hinungdan sa pagpamusil sa mga biktima.
Padayon ang imbestigasyon sa kapulisan sa siyudad sa Cotabato sa nahitabo. (EEF)