DAKO ang posibilidad nga mataktak sa trabaho ang usa ka pulis kinsa ‘maoy’ kung mahubog.
Una niini niadtong Dominggo, Pebrero 17, gisikop sa Talomo Police Station si Police Officer (PO) 1 Glonard Bryan Bisaga Maneja, 31, dunay kapuyo, ug residente sa Shrine Hills, Matina Davao City.
Si PO1 Maneja nadestino sa Mobile Patrol Group sa Davao City Police Office (DCPO), kinsa gidakop subay sa reklamo sa nagpakabanang katawhan sa dapit kay nagpabuto kini siya sa iyang service firearm.
Nakurat ang mga residente dihang nagpabuto ang maong pulis pito ka higayon sa iyang pusil didto sa Shrine Hills.
Sa pagresponde sa kapulisan, nakuha ang armas niini apil ang mga buhing bala ug pito ka mga basiyo.
Gibutyag ni DCPO director Senior Supt. Alexander Tagum nga walay luna sa Davao City ang mga buluyagon nga mga pulis.
“Walay luna ang sama ni PO1 Maneja sa DCPO, pasakaan namo siya og kaso ug dako ang posibilidad nga matanggal siya sa pagkapulis,” ingon ni Tagum.
Dugang sa opisyal nga magsilbi kining leksyon sa tanang mga pulis nga di gayod maayong mohimo og salaud gumikan sila ang modelo ug dangpanan sa katawhan.
Ang Intelligence and Detection Management Branch sa DCPO miandam na sa mga kaso nga ipasaka batok kang PO1 Maneja.
Nakahan-ay ang mga kasong administratibo sa hanay sa kapulisan, kalapasan sa Commission on Elections gun ban, alarm and scandal, ug ang kalapasan sa Republic Act (RA) 9262 kon Violence Against Women and their Children.
Giingon sab ni Tagum nga ilang subayon kung mopasaka ba og kaso ang kapuyo subay sa RA 9262 gumikan kay iyang gipabuthan pito ka higayon ang iyang ka live-in partner human sila naglalis.
“Amoa pang istoryahon ang iyang ka live-in partner aron makapasaka ta og kaso sa RA 9262,” ingon ni Tagum.
Dugang pa nga bisan niadto atol sa iyang training sa pagkapulis, gireklamo na si PO1 Maneja gumikan dali lamang kining mag-maoy.
Gisaad ni Tagum nga iyang hatagan og leksyon ang maoy nga pulis.
Sa kasamtangan, balhog karon sa selda sa Talomo Police Station si PO1 Maneja. (RFN)