PATAY na nga nakaabot sa tambalanan ang usa ka 30-anyos nga lalaki human naghikog sulod sa kuwarto sa Catalunan Grande, Davao City, Dominggo sa kaadlawon, Pebrero 17.
Giila ang nagpakamatay nga usa ka alyas Boy, usa ka call center agent ug residente sa maong dapit.
Subay sa imbestigasyon sa kapulisan sa Talomo Police Station, nadiskubrehan na lamang sa iyang inahan ang biktima nga nagbitay sulod sa iyang kuwarto gamit ang habol.
Daling gidala ang biktima sa balay tambalanan apan gideklara kini nga dead on arrival.
Una niini, nasubo na ang biktima dihang iyang nasayran nga gireklamo na siya sa Talomo Philipine National Police (PNP) gumikan giingong gimolestiya niini ang iyang pag-umangkon sa makadaghang higayon.
Giangkon usab sa inahan nga nadepress na pag-ayo ang iyang anak dihang nasayran nga nakabalo na ang kapulisan sa iyang gihimo.
Gibutyag sab ni Chief Inspector Ronald Lao sa Talomo PNP nga nadawat nila ang reklamo ug plano na unta nilang ipasaka ang kaso ubos sa regular filing batok sa biktima.