GIBUTYAG ni Misamis Oriental Provincial Election Officer abogado Aleli Ramirez nga sa kasamtangan wala pay nadawat nga mga reklamo ang buhatan.
Matud ni Ramirez sa SunStar SuperBalita nga walay bisan usa ka disqualification case nga ilang nadawat sa probinsya lakip na ang mga iligal nga pagpangampanya bisan layo pa ang eleksyon ug kining mga pagbutang og mga poster nga wala nahisubay sa gabayan sa Commission on Election (Comelec).
Dugang ni Ramirez nga ang probinsya sa Misamis Oriental adunay 300,000 ka mga botante apan moabot lamang sa katunga niini ang posibleng makabotar.
Hangyo lamang niini sa mga pulitiko nga mosunod lamang sa gabayan sa buhatan aron walay problema nga masinati panahon sa election.
Gikatakdang magsugod ang campaign period karong bulan sa Marso samtang nagsugod na ang kampanya sa mga nagpapili sa national sama sa pagka senador. (SVB)