WALAY mahitabong flying voters o mga pagduda sa mga botante sa gikatakdang election karong umaabot nga Mayo.
Kini ang gibutyag ni Misamis Oriental Provincial Election Officer abogado Aleli Ramirez sa interbyu sa SunStar SuperBalita.
Kini tungod sa presensya sa tablet nga naka-instalar na ang voters verification and voters registration.
Usa kini ka system nga adunay walo ka pulgada ang katas-on ug usa ka fingerprint scanner.
Matud ni Ramirez nga pag-abot pa lamang sa botante sa presinto, mag finger print sila niini nga tablet ug pinaagi niini mogawas didto ang profile sa botante, lakip iyang pangalan, lugar kon diin kini narehistro, ug asa siya nga presinto.
Molampos sa pagboto ang botante kung anaa sa maong presinto iyang pangalan ug verified kini sa maong tablet.
Dili mahitabo ang flying voters niini tungod kay kun natatak na ang finger print sa sulod niini nagpasabot nakaboto na kini kun asa kini narehistro.
Gawas niini ang adunay voting counting machine nga gigamit sa pagboto diin didto gihapon i-feed ang mga balota.
Dili mahitabo nga mausab kini kay kun magbalik ang maong balota nga dunay susama nga botante adunay motingog nga “the duplicate ballot has been detected.”
Sa pagkakaron nagpadayon ang roadshow sa Commission on Elections aron pagpasabot sa tanang kalungsoran sa bag-ong sistema karon sa pagboto sa umaabot piliay.