DUHA ang nakabsan sa kinabuhi sa managlahi nga panagbangga sa siyudad sa Cagayan de Oro niadtong Sabado, Pebrero 16.
Patay si Rogelio Edpalina, 72, taga Oro Habitat, Calaanan, Canitoan ning siyudad human nabanggaan sa Super 5 bus nga gimaneho ni Reo Francisco, 39, taga Don Carlos, Bukidnon.
Ang insidente nahitabo sa Coastal Road, Kolambog, Lapasan ning siyudad sa Cagayan de Oro.
Sa nahipos nga impormasiyon gikabutyag nga gikan naligo ang biktima apan sa dihang patabok na sa dalan aksidente kining nabanggaan sa Super 5 nga bus.
Giingong mingaw ang maong dapit niadtong higayona ug wala nabantayan sa biktima ang naghaguros nga bus ug lakip usab ang drayber ang wala makakita niini.
Dali pa kining gidala sa Northern Mindanao Medical Center (NMMC) pinaagi sa ambulansiya sa Bureau of Fire and Protection (BFP) apan wala na kini naluwas.
Samtang laing lalaki usab ang patay human nabanggaan ang gisakyan nga motorsiklo og dumptruck sa susama nga adlaw pasado alas 4:00 sa hapon diha sa Barangay Cugman ning siyudad.
Ang biktima naila nga si Oliver Malinao, 36, taga Calaanan, Canito-an ning siyudad samtang ang nagmaneho residente matud pa sa Tagoloan, Misamis Oriental.
Matud sa kauban sa trabaho sa biktima nga sa dihang naka-istorya pa kini mibutyag kini nga kalit lamang nga miliko ang dumptruck padulong kaniya hinungdan sa maong aksidente diin natumba ang biktima ug nalatayan pa ang tiil niini.
Dali usab kining gidala sa NMMC ug gitabang pa kini sa pipila ka higayon apan pasado alas 6:00 sa gabii gideklara kining patay na.
Ang maong mga patay nga lawas ang gi-atiman na sa nahabiling pamilya.